უცხოელი კლიმატოლოგების ნაწილი ვარაუდობს, რომ პლანეტაზე წელს ძალიან ცხელი ზაფხული იქნება. ჩვენ დავინტერესდით, თუ როგორი იქნება ამ კუთხით მდგომარეობა საქართველოში. ამ და სხვა საინტერესო საკითხებზე გრძელვადიანი პროგნოზების განყოფილების უფროსი, ხათუნა ქოქოსაძე გვესაუბრება.
– ქალბატონო ხათუნა, საინტერესოა, ჯერ გაზაფხულის პროგნოზით დავიწყოთ…
– 9 მარტს ცოტას გამოიდარებს, თუმცა, ზოგან შენარჩუნდება მცირე ნალექი. 10 მარტს დასავლეთ საქართველოს უმეტეს რაიონში და აღმოსავლეთ საქართველოს ზოგიერთ რაიონში იქნება წვიმა, მთაში და მაღალმთაში კი თოვლი. 11 მარტს დღისით გამოიდარებს და 14 მარტის ჩათვლით, უნალექო ამინდია მოსალოდნელი. დასავლეთ საქართველოში დღისით ტემპერატურა 8 -13 გრადუსამდე იქნება, შემდეგ დღეებში 15 გრადუსამდე მომატებს, 11 მარტს დღისით გამოიდარებს. 14 რიცხვამდე ტემპერატურა საკმაოდ მაღალი იქნება – დასავლეთ საქართველოში 20-25 გრადუსამდე აიწევს, ხოლო აღმოსავლეთ საქართველოში ტემპერატურა 17 და 18 გრადუსს მიაღწევს. 15 მარტს ისევ ნალექს ველოდებით.
– შარშან ცხელი ზაფხული იყო. ზოგიერთი უცხოელი წელს უფრო ცხელ ზაფხულს პროგნოზირებს. საქართველოსთან დაკავშირებით რისი თქმა შეგვიძლია?
– ძალიან ადრეა ჯერ ზაფხულზე საუბარი, რადგან ზაფხულის პროგნოზზე მუშაობა იწყება მაისის ბოლოს. თუმცა კლიმატის ცვლილებიდან გამომდინარე, ზოგადად, ტემპერატურამ მოიმატა. წინა ზაფხული საკმაოდ ცხელი იყო, ნორმასთან შედარებით 2-3 გრადუსით მეტი. ეს განპირობებული იყო წყნარ ოკეანეში მიმდინარე პროცესით, რომელიც ფაზაში შევიდა აგვისტოს მეორე ნახევარში და ძალიან აქტიური იყო ნოემბერ-დეკემბრამდე. ამიტომ ამ პერიოდში ტემპერატურა საკმაოდ მაღალი და დეკემბერი 3-4 გრადუსით თბილი იყო. ახლა ამინდზე გავლენას ახდენს წყნარ და ატლანტის ოკეანეებში მიმდინარე პროცესები. ეს ჩვენს ტერიტორიაზეც აისახება. კერძოდ, ქარის მასები ატლანტის ოკეანიდან მოძრაობენ ევროპისა და აზიის მხარეს. თუმცა წყნარ ოკეანეში მიმდინარე პროცესი მაინც იწყებს შესუსტებას და სავარაუდოდ, ნეიტრალურ ფაზაში ზაფხულში გადავა… დიახ, საქართველოში შეიძლება მართლაც იყოს ცხელი ზაფხული, თუმცა, როგორც უკვე გითხარით, ზუსტი პროგნოზის გაკეთება ძნელია.
– კლიმატის ცვლილება გლობალური პრობლემაა…
– დიახ, პრობლემა გლობალურია და აუცილებელია თბოენერგიის მოხმარება შემცირდეს – გაზის, საწვავის გამოყენება. ასევე, არ უნდა იყოს დიდი რაოდენობით გამონაბოლქვი, რომ სითბური ეფექტი არ შეიქმნას. ასევე, ტყის საფარზეც უნდა ვიზრუნოთ ადამიანებმა და ყველაფერი უნდა გავაკეთოთ, რომ ხეები ასეთი მასშტაბით არ იჩეხებოდეს.
– ამ გაზაფხულზე წყალდიდობები ხომ არ არის მოსალოდნელი?
– მთიან და მაღალმთიან ზონაში ჯერჯერობით საკმაოდ დიდი თოვლის საფარია. ჯერჯერობით არ არის ისეთი მდგომარეობა, რომ ტემპერატურამ მკვეთრად მოიმატოს და ამის ფონზე უხვი ნალექი მოვიდეს. თუ თოვლმა ნელ-ნელა დაიწყო დადნობა, არაფერი მოხდება. წყალდიდობების საშიშროება ჯერ არ არის.
კვირის პალიტრა
მსგავსი სტატიები:
“ივანიშვილი, ბლუ, ყეყეჩი, გაუნათლებელია, მაგრამ აქვს ფულის კეთების განსაკუთრებული ალღო”
საია: 334 პატიმრობიდან 69 დაუსაბუთებელია
ივნისიდან კომუნალური გადასახადების გავლენა ინფლაციაზე კიდევ უფრო გაიზრდება – სებ-ი
“საქართველოს ბანკზე” თავდასხმის ფაქტზე შსს საგანგებო განცხადებას ავრცელებს
“რომ გამოვიდე, თავი მოვიკლა და სახელმწიფოს ვუთხრა, პოლიტიკური პასუხისმგებლობა გაკისრია, სწორი იქნება?!” – ბექა დავითულიანი
დაინფიცირებულთა დღიური რაოდენობა შესაძლოა 30 ათასს გაუტოლდეს
როგორ აღწერს მარიოპოლის მკვიდრი მისი ქალაქის ყოფას
კახა ასკურავას ჯანმრთელობის მდგომარეობა დამძიმდა