“გალუმპული ახალგაზრდები წყლის ჭავლის წინ დგანან, ბებიები ძალოვანების ხელკეტებს უძლებენ” – ბერბოკი საქართველოზე წერს

საქართველოში განვითარებული მოვლენები მსოფლიოს ყურადღების ცენტრშია – ამჯერად ქართველი ერის პროტესტსა და “ქართული ოცნების” ანტიევროპულ პოლიტიკაზე გერმანიის საგარეო საქმეთა მინისტრი, ანალენა ბერბოკი წერს.

ბერბოკი სოციალურ ქსელში საპროტესტო აქციის ფოტოს აქვეყნებს და წერს, რომ “გალუმპული ახალგაზრდები ევროპის დროშებით წყლის ჭავლის წინ დგანან. ბებიები უძლებენ ყინვასა და ძალოვნების ხელკეტებს”.

ბერბოკი აღნიშნავს, რომ საქართველოს მოსახლეობის უმრავლესობას სურს, რომ მათმა ქვეყანამ ევროპულ გზაზე სვლა გააგრძელოს, თუმცა ამას “ოცნება” ძალადობითა  და დაშინებით პასუხობს.

გალუმპული ახალგაზრდები ევროპის დროშებით წყლის ჭავლის წინ დგანან. ბებიები უძლებენ ყინვასა და ძალოვნების ხელკეტებს. თბილისის ქუჩებში მოცეკვავე ადამიანები ქართული და ევროპული დროშებით არიან გახვეულები. რამდენიმე კვირის განმავლობაში ათობით ათასი ქართველი გაბედულად აწყობს დემონსტრაციას თავისი ქვეყნის ევროპული მომავლისთვის.

საქართველოს მოსახლეობის უმრავლესობას სურს, რომ მათმა ქვეყანამ ევროპულ გზაზე სვლა გააგრძელოს. ისინი ევროპას საკუთარ გულებში ატარებენ, პროტესტი მათი ხმაა. მაგრამ მმართველი პარტია, “ქართული ოცნების” პასუხისმგებელი პირები დაშინებით, ძალადობითა და წყლის ჭავლით პასუხობენ”, – წერს ბერბოკი.

გერმანიის საგარეო საქმეთა მინისტრი ვრცელ პოსტში ყურადღებას ივანიშვილის გუნდის მიერ საქართველოში დემოკრატიისთვის ძირის გამოთხრას უთმობს და პირდაპირ ამბობს, რომ მმართველმა პარტიამ ევროკავშირში ქვეყნის გაწევრიანების პროცესი მიზანმიმართულად შეაჩერა.

“შედეგად, ჩვენ შევამცირეთ ჩვენი თანამშრომლობა ქვეყნის ხელისუფლებასთან და 200 მილიონ ევროზე მეტი ღირებულების მხარდაჭერის პროექტები შევაჩერეთ” – წერს ანალენა ბერბოკი.

ამასთან, ევროპელი პოლიტიკოსი ხაზს უსვამს, რომ “ოცნების” ავტორიტარული პოლიტიკის გამო, ევროკავშირში საქართველოს საკითხზე უახლოეს მომავალში იმსჯელებენ.

2023 წლის დეკემბერში საქართველოსთვის ევროკავშირის კანდიდატის სტატუტის მინიჭება რეფორმების გატარების მკაფიო დაპირებებთან იყო დაკავშირებული. თუმცა ანტიევროპული სვლით, LGBTQI უფლებების უგულებელყოფით, ე.წ. გამჭვირვალობის კანონითა და ბევრი სხვა რამით, “ქართულმა ოცნებამ” მიზანმიმართულად შეაჩერა ევროკავშირში საქართველოს გაწევრიანების პროცესი.

შედეგად, ჩვენ შევამცირეთ ჩვენი თანამშრომლობა ქვეყნის ხელისუფლებასთან და 200 მილიონ ევროზე მეტი ღირებულების მხარდაჭერის პროექტები შევაჩერეთ. “ქართული ოცნების” მზარდი ავტორიტარული პოლიტიკის გამო, ჩვენ ევროკავშირშიც ახლა უნდა ვიმსჯელოთ საქართველოს გაწევრიანების პროცესის ოფიციალურად შეჩერებაზე.

“ქართული ოცნების” პასუხისმგებელ პირებს ევალებათ, ხალხის ევროპული ოცნებები რეალობად აქციონ და ყველაფერი გააკეთონ ნდობის აღსადგენად და ღრმა პოლიტიკური კრიზისის დასასრულებლად – ევროკავშირში გაწევრიანების გზაზე დასაბრუნებლად, მაგრამ, პირველ რიგში, ყველა ქართველის უკეთესი მომავლისთვის”, – წერს ბერბოკი.