ეუთოს დემოკრატიული ინსტიტუტებისა და ადამიანის უფლებათა ოფისის (OSCE/ODIHR) თქმით, საქართველოში მიღებული კანონი “უცხოელი აგენტების რეგისტრაციის შესახებ”, რომელიც ავალდებულებს ყველა პირს ან ორგანიზაციას, რომელიც უცხოური სუბიექტის ინტერესებით მოქმედად მიიჩნევა, მაგალითად, უცხოური დაფინანსების გამო – დარეგისტრირდეს როგორც უცხოელი აგენტი და აწესებს სანქციების უარის თქმის შემთხვევაში, “დამატებით შეშფოთებას იწვევს ბოლო პერიოდში მიღებულ სხვა კანონებთან ერთად და უარყოფითად აისახება სამოქალაქო საზოგადოებაზე”.
“ეს კანონი მნიშვნელოვან გავლენას ახდენს სამოქალაქო საზოგადოების მუშაობაზე და იმ ადამიანებზე, ვინც ადამიანების უფლებების დასაცავად მუშაობენ. სამოქალაქო საზოგადოება სასიცოცხლოდ მნიშვნელოვანია ყველა დემოკრატიისთვის და ნებისმიერმა ახალმა მოთხოვნამ უნდა გააძლიეროს მათი მნიშვნელოვანი მუშაობა საერთაშორისო სტანდარტების შესაბამისად,ნაცვლად შეზღუდვების დაწესებისა” – თქვა ODIHR-ის დირექტორმა, მარია თალალიანმა.
როგორც OSCE/ODIHR-ის განცხადებაშია აღნიშნული, ახლად მიღებულმა კანონმა უნდა შეცვალოს გასულ წელს მიღებული კანონი “უცხოური გავლენის გამჭვირვალობის შესახებ”. ორგანიზაცია შეშფოთების ფონზე აღნიშნავს, რომ ახალი კანონი შეაფერხებს გაერთიანების, მშვიდობიანი შეკრებისა და გამოხატვის თავისუფლების უფლებას.
“კანონმა, სხვა ბოლოდროინდელ საკანონმდებლო ინიციატივებთან ერთად, შეიძლება, კიდევ უფრო შეზღუდოს სამოქალაქო საზოგადოების ორგანიზაციებისა და უფლებადამცველების საქმიანობა მათი საქმიანობის განსახორციელებლად საჭირო გარანტიების გაუქმებით”. – წერია განცხადებაში.
როგორც OSCE/ODIHR-მა გასული წლის სამართლებრივ ანალიზში აღნიშნა, “აშშ-ს უცხოური აგენტების რეგისტრაციის აქტს, რომელზეც საქართველოს ახალი კანონია დაფუძნებული, აქვს სამართლებრივი გარანტიები, რომლებიც ხელს უშლის სამოქალაქო საზოგადოების უცხოური გავლენის ინსტრუმენტად მონიშვნას, მხოლოდ უცხოეთიდან მიღებული დაფინანსების გამო. ამის ნაცვლად, ის ცდილობს, უზრუნველყოს, რომ კერძო კომპანიები ან არაკომერციული ორგანიზაციები, რომლებიც მონაწილეობენ უცხოური ძალების სახელით ადვოკატირებაში ან ლობირებაში, დარეგისტრირდნენ სახელისუფლო ორგანოებში და ეს ინფორმაცია საჯაროდ იყოს ხელმისაწვდომი. ერთი ქვეყნიდან მეორეში კანონმდებლობის იმპორტს ყოველთვის სიფრთხილით უნდა მივუდგეთ და უნდა განიხილებოდეს უფრო ფართო ეროვნული ინსტიტუციური და სამართლებრივი ჩარჩოს კონტექსტში”.
ამასთან, OSCE/ODIHR საქართველოს ხელისუფლებას მოუწოდებს, გადახედოს ამ საკანონმდებლო ინიციატივის განხორციელებას და კიდევ ერთხელ ადასტურებს კანონის დეტალური გადაფასების აუცილებლობას. ეუთოს ოფისი მზადაა, დაეხმაროს საქართველოს ამ სფეროში საკანონმდებლო ბაზის გაუმჯობესებაში სამართლებრივი მიმოხილვისა და კონსულტაციის სხვა ფორმების საშუალებით, მრავალწლიან გამოცდილებაზე დაყრდნობით.
ამავდროულად, განცხადებაში ხაზგასმულია, რომ ეუთოს ყველა მონაწილე სახელმწიფომ აიღო ვალდებულება, დაიცვას შეკრების, გაერთიანებისა და გამოხატვის თავისუფლების უფლებები, როგორც კანონით, ასევე პრაქტიკაში. “მათ ასევე აღიარეს სამოქალაქო საზოგადოების მნიშვნელობა ადამიანის უფლებების, დემოკრატიისა და კანონის უზენაესობის ხელშეწყობისთვის. მიუხედავად იმისა, რომ ლობისტური საქმიანობის რეგულირება მნიშვნელოვანი ინსტრუმენტია საზოგადოებრივი გადაწყვეტილებების მიღების გამჭვირვალობისა და სამართლიანობის უზრუნველსაყოფად, ასევე, კორუფციის თავიდან ასაცილებლად, მან პატივი უნდა სცეს ამ უფლებებს და არ ხელყოს პოლიტიკური და საზოგადოების მონაწილეობა”.
მსგავსი სტატიები:
ამ არჩევნებს ამერიკის მთავრობა განსაკუთრებული ყურადღებით აკვირდება – სახელმწიფო დეპარტამენტის წარმომადგენელი
“გელათში შექმნილი ვითარება ყველას პასუხისმგებლობის საკითხია”
შმაგი ბოლქვაძე ევროპის ჩემპიონია
დეგნანი კობახიძეს: “მეც პირადად მაქვს გამოცდილება და განათლება კონსტიტუციურ სამართალში”
რუსეთი უკრაინაში გენოციდს სჩადის – ანდჟეი დუდა
“ევროკავშირის ლიდერებმა თავიანთი მოსაბეზრებელი რუსოფობიური კრიახით ტვინი წაიღეს” – მედვედევი
ხელისუფლება ყველა პლატფორმაზე ებრძვის მისთვის მიუღებელ აზრს, თავს შევაკლავთ და არ დავნებდებით – თამრიკო ჭოხონელიძე
გვწერდნენ, თქვენმა გუნდმა გაალამაზა ეს ევროპის ჩემპიონატიო და ამით ყველაფერი ნათქვამია – ეროვნული ნაკრების ექიმი