რამდენიმე საათის წინ ირანში ისრაელმა დიდი მასშტაბისა და სიზუსტის სპეცოპერაცია ჩაატარა

ირანის სტრატეგიული სარაკეტო ინფრასტრუქტურის წინააღმდეგ განხორციელებული ავიაიერიშების წინ რამდენიმე ფარული ოპერაცია ჩატარდა — ამის შესახებ იუწყება ისრაელის მედია

მოსადის ოპერატორებმა ირანში ფარულად შეიტანეს დიდი რაოდენობით მაღალი სიზუსტის იარაღი და ისინი სხვადასხვა ადგილას განათავსეს. ეს იარაღი კი შემდეგ გამოიყენეს ირანის საჰაერო თავდაცვის სისტემებისა და შორსმსროლელი რაკეტების გამშვები დანადგარების გასანადგურებლად- მასობრივი ავიაიერიშის ფარგლებში.

როგორც ირკვევა, მოსადმა ასევე გაგზავნა კომანდოს ჯგუფები, რომლებიც საჰაერო თავდაცვის სისტემებთან ახლოს საბრძოლო მასალებს ათავსებდნენ, რათა გაენეიტრალებინათ მათი მოქმედება;

ოპერაციის დასაწყისში დრონებისა და ზუსტი დამიზნების რაკეტების ( SPIKE-ები სავარაუდოდ) გასაშვებად ირანის საჰაერო თავდაცვის სამიზნეების მიმართულებით გამოყენებულ იქნა სატვირთო მანქანებზე დამონტაჟებული საბრძოლო სისტემები;

შეიქმნა დრონების ბაზა ირანის შიგნით, თეირანის დასავლეთით, რათა რაკეტების გამშვებ მოწყობილობებზე თავდასხმა ზუსტად მოეხდინათ- უცნობია ხელოვნური ინტელექტით იმართებოდა დრონები, თუ ადგილზე მყოფ ოპერატორებს გაჰყავდათ ისინი მიზნებზე.

გარდა ამისა, უსაფრთხოების სხვა ისრაელურმა წყარომ „როიტერსს“ განუცხადა, რომ მოსადისა და ისრაელის არმიის ერთობლივი ძალისხმევა სწორედ ირანის სტრატეგიული სარაკეტო შესაძლებლობების დასუსტებას ისახავდა მიზნად.

ისრაელის სამხედრო-საჰაერო ძალების გამანადგურებლებმა დაზვერვის განყოფილებიდან მიღებული ზუსტი მონაცემების საფუძველზე ფართომასშტაბიანი იერიში მიიტანეს ირანის რეჟიმის საჰაერო თავდაცვის სისტემებზე ქვეყნის დასავლეთ ნაწილში- განადგურდა ათეულობით რადარი და საჰაერო თავდაცვის კომპლექსთა გამშვები დანადგარი.