ჟურნალისტების უსაფრთხოების პლატფორმამ ქართულ მედიებზე განგაშის სიგნალი ჩართო

ევროსაბჭოს ჟურნალისტების უსაფრთხოების პლატფორმა ანტიკორუფციული ბიუროს მიერ ქართული მედიასაშუალებებისგან ინფორმაციის მოთხოვნასთან დაკავშირებით განცხადებას ავრცელებს.

ორგანიზაცია აღნიშნულ საკითხს განგაშის მეორე კატეგორიას ანიჭებს.

ევროსაბჭოს ჟურნალისტების უსაფრთხოების პლატფორმა “ქართულ ოცნებას” მოუწოდებს შეწყვიტოს მედიის მხარდაჭერისა და სამოქალაქო საზოგადოების ორგანიზაციების თვითნებური შემოწმებები, გააუქმოს გრანტების შესახებ კანონში 2025 წლის აპრილში შეტანილი ცვლილებები და დაასრულოს კანონმდებლობის ბოროტად გამოყენება დამოუკიდებელი ჟურნალისტიკის დასაშინებლად.

გთავაზობთ განცხადებას უცვლელად:

2025 წლის სექტემბრიდან საქართველოს ხელისუფლებამ 2025 წლის აპრილში მიღებული “გრანტების შესახებ” შესწორებული კანონის საფუძველზე სამოქალაქო საზოგადოების და მედია ორგანიზაციების შემოწმებები გააძლიერა. კანონის ახალი მუხლები ითხოვს მთავრობის წინასწარ ნებართვას უცხოური დაფინანსების მისაღებად, სახელმწიფოს თვითნებური ჩარევის საფრთხის გამო მწვავე კრიტიკა მოჰყვა.

8 სექტემბერს, 30-მდე ორგანიზაციამ, მათ შორის მედიის თავისუფლებისა და ინფორმაციაზე წვდომის უშუალო მხარდამჭერმა ჯგუფებმა, განაცხადეს, რომ კორუფციის წინააღმდეგ ბრძოლის ბიუროდან ინსპექტირების შეტყობინება მიიღეს, რომელიც ცვლილებების ძალაში შესვლის შემდეგ მათი საქმიანობის შესახებ ვრცელ ინფორმაციას ითხოვდა. სამიზნე ორგანიზაციებს შორისაა: ინფორმაციის თავისუფლების განვითარების ინსტიტუტი (IDFI), მედია ცენტრი კახეთი, საქართველოს ახალგაზრდა იურისტთა ასოციაცია (საია), უფლებები საქართველო, სამოქალაქო იდეა, ადამიანის უფლებათა ცენტრი. მიუხედავად იმისა, რომ ამ ორგანიზაციებმა მიუთითეს მოთხოვნების სამართლებრივი საფუძვლის არარსებობაზე, 17 სექტემბერს თბილისის საქალაქო სასამართლომ დააკმაყოფილა ბიუროს სარჩელები ცხრა ორგანიზაციის წინააღმდეგ და დაავალა მათ მოთხოვნების შესრულება.

2 ოქტომბერს თბილისში დაფუძნებულმა მედიაპლატფორმა OC Media-მ, გაავრცელა ინფორმაცია, რომ შემოწმებების ტალღა შეეხო რამდენიმე ონლაინ მედიასაშუალებასაც. მათ შორის არიან: Project 64, მთა ამბების პლატფორმა “მთის ამბები”, ორგანიზებული დანაშაულის კვლევის მედიაცენტრი, რომელიც მართავს საგამოძიებო მედიას iFact-ს. OC Media-სა და ორგანიზებული დანაშაულისა და კორუფციის გაშუქების პროექტის (OCCRP) ინფორმაციით, 60-ზე მეტ მედიასა და სამოქალაქო ორგანიზაციას დაეკისრა ვალდებულება, წარადგინონ დეტალური ინფორმაცია დონორებისა და გრანტების შესახებ.

ანტიკორუფციულმა ბიურომ ითხოვა: ხელშეკრულებები, ბიუჯეტები, დაფინანსების განრიგი, სამუშაო გეგმები, შესრულების ანგარიშები. ამ ყველაფრის წარსადგენად ორგანიზაციებს მხოლოდ სამი სამუშაო დღე მისცეს. წერილებში არ იყო მითითებული მკაფიო სამართლებრივი საფუძველი.
დაზარალებული მედიის რედაქტორებმა და დამფუძნებლებმა მოთხოვნები შეაფასეს როგორც თვითნებური, გაუმართლებლად მძიმე და კონფიდენციალურობის უფლებების დარღვევის შემცველი.

ეს შემოწმებები წინ უძღოდა ივნისსა და აგვისტოში ჩატარებულ მონიტორინგს, როდესაც ხელისუფლებამ გამოიყენა “უცხოური აგენტების შესახებ” კანონი, რითაც მოითხოვა სენსიტიური მონაცემები და გაყინა იმ ჯგუფების ანგარიშები, რომლებსაც საპროტესტო აქციების მხარდაჭერაში ადანაშაულებდა.

საქართველოს ხელისუფლებამ უნდა შეწყვიტოს მედიის მხარდაჭერისა და სამოქალაქო საზოგადოების ორგანიზაციების თვითნებური შემოწმებები, გააუქმოს გრანტების შესახებ კანონში 2025 წლის აპრილში შეტანილი ცვლილებები და დაასრულოს კანონმდებლობის ბოროტად გამოყენება დამოუკიდებელი ჟურნალისტიკის დასაშინებლად. გრანტებისა და უცხოური დაფინანსების მარეგულირებელი კანონები გამჭვირვალე და შესაბამისობაში უნდა იყოს გაერთიანებისა და გამოხატვის თავისუფლების საერთაშორისო სტანდარტებთან,” – წერია ორგანიზაციის განცხადებაში.

გააზიარეთ და მოიწონეთ სტატია: