კალაძე-გვანცელაძე მე დავნიშნე, თუმცა მის გადაცდომებზე პასუხისმგებელი არ ვარ

რას ნიშნავს კახა გვანცელაძე ჩემი კადრი იყო? მე არ მყავს ჩემი კადრები და როცა ვინმეს რაიმე თანამდებობაზე ვნიშნავ, მათი საქმიანობის და პროფესიონალიზმის შეფასების მიხედვით ვმოქმედებ. სხვათა შორის, 2017 წელს დედაქალაქის მერიაში რომ მოვედი, კახა გვანცელაძე უკვე მუშაობდა ჩვენს უწყებაში“, — განაცხადა თბილისის მერმა კახა კალაძემ.

კალაძე ამბობს, რომ გვანცელაძე ბაღების სააგენტოს უფროსად დანიშნა, თუმცა მის გადაცდომებზე პასუხისმგებელი არაა.

„კი, [ბაღების] სააგენტო ჩვენს დაქვემდებარებაშია, კახა გვანცელაძე ამ თანამდებობაზე ჩემი დანიშნულია და ასე ძალიან ბევრი თანამშრომელია ჩემი დანიშნული. მე გახლავართ დედაქალაქის მერი, 30 000-მდე თანამშრომელი გვყავს უწყებაში. როგორ ფიქრობთ, ყველას გადაცდომაზე მე ვარ პასუხისმგებელი? მე რომ საქმის კურსში ვყოფილიყავი, რეაგირება მოჰყვებოდა. არაერთხელ გამიფრთხილებია თანამშრომლები, მათ შორის მთავრობის სხდომებზე მაქვს გაკეთებული განცხადებები, რომ არცერთი გადაცდომა და

კანონსაწინააღმდეგო ქმედება არ დარჩებოდა რეაგირების გარეშე“, — განაცხადა კალაძემ.

კალაძემ ჟურნალისტებს მოუწოდა, ნუ დაარღვევენ უდანაშაულობის პრეზუმფციას და დაელოდონ გამოძიების შედეგებს.

თბილისის მერიის საბავშვო ბაგა-ბაღების მართვის სააგენტოს ყოფილ დირექტორს კახა გვანცელაძეს და მის თანამშრომლებს ბრალი წარუდგინეს კორუფციასთან დაკავშირებულ საქმეზე, რომელშიც სუს-ის ყოფილი უფროსი, გრიგოლ ლილუაშვილიც ფიგურირებს. პროკურატურის თანახმად, კახა გვანცელაძე საბავშვო ბაღების მიერ განსახორციელებელი შესყიდვების ხელშეკრულებების გაფორმებაში მეწარმე სუბიექტებისგან ქრთამის სახით განსაკუთრებით დიდი ოდენობის თანხებს, ე.წ. „ატკატებს“ იღებდა. მას მფარველობას უწევდა გრიგოლ ლილუაშვილი, ხოლო დანაშაულებრივ სქემაში კახაბერ გვანცელაძეს ჩართული ჰყავდა სააგენტოს ფინანსური აღრიცხვისა და გაანგარიშების, ასევე მონიტორინგის თანამშრომლები.