“სააკაშვილს რომელი ღირსება შეელახა? ადამიანებს უარეს მდგომარეობაში ჰყავთ ნანახი” – კობახიძე

“სააკაშვილს რომელი ღირსება შეელახა? უარეს მდგომარეობაში ჰყავთ ადამიანებს ნანახი – სახურავზე „კარლსონივით“ და თმებით როგორ ათრევდა უკრაინელი სამართალდამცველი”, – ამის შესახებ „ქართული ოცნების“ თავმჯდომარე ირაკლი კობახიძემ „პალიტრანიუსის“ ეთერში  განაცხადა. ირაკლი კობახიძემ ისაუბრა სააკაშვილთან დაკავშირებით, სახელმწიფო ინსპექტორის სამსახურის დასკვნაზე, რომლის თანახმადაც, გლდანის №18 პენიტენციურ დაწესებულებაში მიხეილ სააკაშვილის იძულებით შესახლების კადრების გასაჯაროება „ღირსების შემლახავია“.

მმართველი პარტიის თავმჯდომარე აცხადებს, რომ თუ უწყება არ გაასაჯაროვებდა კადრებს, იქნებოდა საფუძველი სპეკულაციების გაგრძელებისთვის.

„საბოლოო ჯამში, თქვენ ნახეთ მთლიანობაში, კადრები, ჩანაწერები გავრცელდა ჩვეულებრივად. ათასგვარი უტრირებული განცხადებები იყო, მათ შორის წამება. ღიმილისმომგვრელი განცხადებები კეთდებოდა ამასთან დაკავშირებით. იყო წინააღმდეგობა, რომელიც გასწია პატიმარმა, წინააღმდეგობის გაწევის პირობებში მოუწია სასჯელაღსრულების დაწესებულებას მოქმედება.

რაც შეეხება კადრების გამოქვეყნებას, შეგახსენებთ, რომ მისი პოლიტიკური პარტიის და ამ პარტიასთან დაკავშირებული მედიასაშუალებების კატეგორიული მოთხოვნა იყო, რომ ეს კადრები დადებულიყო, რაც სააკაშვილთანაც იქნებოდა ბუნებრივია, შეთანხმებული. მისი პარტია თავისი ტელევიზიებით კატეგორიულად ითხოვდა ამ კადრების გასაჯაროვებას, რაც გაკეთდა.

მისი პარტია ითხოვდა გასაჯაროვებას და პლიუს ამას დაემატა საზოგადოებრივი ინტერესი, რომელიც შეიქმნა. მთლიანობაში იყო მაღალი საზოგადოებრივი ინტერესი. ეს არის ოფიციალური მიზეზიც.

ხელოვნურად, თუ როგორც იყო, მაღალი საზოგადოებრივი ინტერესი შეიქმნა. იმ შემთხვევაში თუ სახელმწიფო უწყება არ გაასაჯაროვებდა ამ კადრებს, იქნებოდა საფუძველი სპეკულაციების გაგრძელებისთვის“, – აცხადებს კობახიძე.

კობახიძის მტკიცებით, “ნაციონალური მოძროაბისთვის” მომგებიანი იყო სახელმწიფოზე ზეწოლა და კადრების არგასაჯაროვება.

„სახელმწიფოსთვის მნიშვნელოვანი იყო რა, სახელმწიფოს ერთ-ერთი ფუნქცია რა არის, რომ საზოგადოება არ შეაყვანინოს არავის შეცდომაში. ამისთვის მოხდა კადრების გასაჯაროვება“, – აღნიშნა კობახიძემ და დასძინა: „რომელი ღირსება შეელახა რეალურად?“.

კობახიძის მტკიცებით, სააკაშვილი ადამიანებს უარეს მდგომარეობაში ჰყავთ ნანახი.

„ერთადერთი რაც გასაჯაროვდა იყო ის თუ როგორ უწევს წინააღმდეგობას სასჯელაღსრულების დაწესებულების თანამშრომლებს, როგორ უწევთ ძალის გამოყენება და ა.შ. ასეთი კადრები სხვადასხვა პირის მიმართ ხშირად საჯაროვდება და ამას არ მოჰყოლია არასდროს არანაირი რეაქცია.

რაც შეეხება იმას, რომ პრეზიდენტი ვიღაცამ იხილა ასეთ მდგომარეობაში, მე შეგახსენებთ, რომ ეს, იგივე ყოფილი პრეზიდენტი უამრავმა ადამიანმა საქართველოსა და მის ფარგლებს გარეთ იხილა სახურავზე კარლსონივით, იხილა თმებით როგორ ათრევდა უკრაინელი სამართალდამცველი. აქცენტი გადაჰქონდათ რაზე იცით? – „პრეზიდენტი არ უნდა დაინახოს ასე ადამიანმა“ და ამაზე უარეს მდგომარეობაში ჰყავთ ნანახი ადამიანებს, ქართველებს და არამარტო ქართველებს მიხეილ სააკაშვილი, როდესაც თმებით ათრიეს“, – განაცხადა კობახიძემ.

კობახიძის შეფასებით სახელმწიფო ინსპექტორის დასკვნა „ცალსახად არასწორი ინტერპრეტაცია იყო“.

კითხვაზე გამორიცხავს, რომ საქმე სტრასბურგში წააგოს სახელმწიფომ, კობახიძე ამბობს: „ჩემს იურიდიულ შეფასებას გაძლევთ, მგონია, რომ ეს იყო ცალსახად არასწორი ინტერპრეტაცია. ვნახოთ, რას იტყვის სტრასბურგი“.

“პოლარიზაციის ჩაკეტილი წრის გარღვევის გასაღები არის ის, რომ „ნაცმოძრაობა“ უნდა დასუსტდეს – ტენდენცია კარგია, მთავარია გაგრძელდეს”, – როგორც კობახიძემ განმარტა, „ნაციონალური მოძრაობის“ დასუსტების პროცესი არჩევნების შემდეგ აქტიურად დაიწყო.

„პოლარიზაცია არის ტვირთი ქვეყნისთვის და მისი განვითარებისთვის, მაგრამ არის ობიექტური გარემოებები, რაც შეუძლებელს ხდის ჩაკეტილი წრის გარღვევას. რეალისტურად თუ შევხედავთ, ერთადერთი რაშიც არის პოლარიზაციის ჩაკეტილ წრის გარღვევის გასაღები, ეს არის ის, რომ „ნაცმოძრაობა“ უნდა დასუსტდეს, როგორც პოლიტიკური ძალა. ტენდენცია კარგია, მთავარია ეს ტენდენცია გაგრძელდეს“, – განაცხადა კობახიძემ და დასძინა: „არჩევნების შემდეგ არის ეს პროცესი აქტიურად დაწყებული“.

ირაკლი კობახიძის თქმით, აღნიშნულს თავის მიზეზები აქვს. კობახიძე ორ ფაქტორს ასახელებს, რომელიც მისივე აზრით, “არსებითად ასუსტებს პარტიას”.

„ერთი – გასაგებია, რომ 31% აიღეს, მაგრამ პრინციპული არჩევნები წააგეს და 3 წელი აღარავითარი არჩევნები აღარ იქნება. მათ თვითონაც იციან, რომ სამი წელი ძალიან გაუჭირდებათ.

მეორე – სააკაშვილი, მათი ბელადი, ერთპიროვნული ლიდერი ჰყავს ამ პოლიტიკურ პარტიას, არის ციხეში“, – განაცხადა კობახიძემ.

ირაკლი კობახიძის თქმით, მიხეილ სააკაშვილი პრობლემა არ არის „ქართული ოცნებისთვის“, თუმცა პრობლემაა ქვეყნისთვის.

„სააკაშვილი ჩვენთვის, როგორც პარტიისთვის საერთოდ არ არის პრობლემა. სააკაშვილი არის პრობლემა ქვეყნისთვის თბილისში ციხეში, უკრაინაში ციხის გარეთ თუ სადღაც ამსტერდამში. ყველგან არის პრობლემა, რადგან ის არის მთავარი დესტრუქციული ძალის ლიდერი. ის აქაც პრობლემაა, იქაც პრობლემაა ქვეყნისთვის, ჩვენთვის არა, მაგრამ რა ვუყოთ ამ პრობლემას, მოცემულობაა“, – განაცხადა კობაძიძემ.

კითხვაზე, გამორიცხავს თუ არა, რომ პრეზიდენტმა სალომე ზურაბიშვილმა მიხეილ სააკაშვილი შეიწყალოს, კობახიძე ამბობს, რომ სალომე ზურაბიშვილმა რამდენჯერმე უკვე განაცხადა, რომ არ შეიწყალებს.

„მას რამდენჯერმე აქვს ნათქვამი, რომ არ შეიწყალებს და ძალიან პრინციპულად აქვს ეს პოზიცია დაფიქსირებული. ამის იქით არანაირი ეჭვების საფუძველი არ გვაქვს“, – განაცხადა კობახიძემ.