იური ლომაძის ბრინჯაო ევროპაზე

რუმინეთის დედაქალაქ ბუქარესტში გრძელდება ევროპის ჩემპიონატი ბერძნულ-რომაულ ჭიდაობაში. პირველი დღის შემდეგ ბრინჯაოსთვის ბრძოლას სამი ქართველი ფალავანი აგრძელდებდა, თუმცა საბოლოოდ მედალს მხოლოდ იური ლომაძე (-77 კგ) დაეუფლა.

საქართველოს პირველი მედალი იური ლომაძემ მოუტანა

იური სტარტზევე დამარცხდა თურქ იუნუს ბასართან, თუმცა, რადგან მეტოქე ფინალში გავიდა, ქართველიც “გაიყოლა” რეპეშაჟში. დღეს იურიმ ბილგარელ სტოიან კუბატოვს 7:5 მოუგო და ბრინჯაოსთვის ბრძოლაში გადაერთო, სადაც ხორვატი ანტონიო კამენიასევიჩი დამაჯერებლად დაამარცხა – 8:0.

ყველაზე მსუბუქ წონაში ნუგზარ წურწუმიამ (-55 კგ) ბრინჯაოს მედლისთვის შეხვედრა მასპინძელ დანიელ მიჰაისთან დათმო – 0:9, ხოლო ყველაზე მძიმეში იაკობ ქაჯაიამ (130) იტალიელ დანილა სოტნიკოვთან 3:9 წააგო.

დღეს ევროპის ჩემპიონატზე კიდევ 5 ქართველი ფალავანი ჩაერთო. ფრიდონ აბულაძემ (-60 კგ) 1/8 ფინალი დათმო სადიკ ლალაევთან – 1:4. ვინაიდან, ლალაევი ფინალში ვერ გავიდა, აბულაძე ასპარეზობას გამოეთიშა.

დიეგო ჩხიკვაძემ (-67 კგ) ძალიან ლამაზი ილეთით დაამარცხა იტალიელი ანდრეა სეტი – 9:0. მანვე მერვედფინალში მიჰაი რადუ მიჰუტიც დაამარცხა – 2:1. ქართველი ფალავანი ნორვეგიელმა მორტენ ტორესენმა შეაჩერა – 1:2. ფინალში ვერც ნორვეგიელი გავიდა.

გიორგი ჩხიკვაძე (-72 კგ) აზერბაიჯანელ ულვი განიზადესთან დამარაცხდა – 1:2. განიზადე ფინალშია. ასე რომ, ხვალ ჩხიკვაძე რეპეშაჟში იჭიდავებს, მეტოქე ფრანგი მამადასა სილაა.

გელა ბოლქვაძემ (-82 კგ) საკვალიფიკაციოში 6:3 მოუგო საფრანგეთის სახელით მოასპარეზე ვლადიმერ ქარჩაიძეს, შემდეგ კი ალბანელი კელსი ნელაიც დაამარცხა – 5:1. მეოთხედფინალში გელა თურქ ალფერენ ბერბერთან დამარცხდა – 1:7. თურქი ფინალშია, ბოლქვაძე კი რეპეშაჟში, სადაც აზერბაიჯანელ რაფიგ ჰუსეინოვს ხვდება.

რობერტ კობლიაშვილმა (-97 კგ) თავიდან იოლად დაამარცხა პატრიკ გორდანი (რუმინეთი) – 9:0, მაგრამ შემდეგ ფინელ არვი მარტინ სავოლაონენთან წააგო – 2:3. სავოლაინენი ნახევარფინალში დამარცხდა, რაც იმას ნიშნავს, რომ კობლიაშვილმა ასპარეზობა დაასრულა.

მოკლედ, ქართულმა დელეგაციამ 1 ბრინჯაო მოიპოვა და ხვალ კიდევ 2-ის შანსი აქვს. წარუმატებელი დღის “ჰაილაითი” კი ლერი აბულაძის დაჯილდოება აღმოჩნდა – ლერი ბერძნულ-რომაულ სტილში 2023 წლის ევროპის საუკეთესო მოჭიდავედ დაასახელეს. მან ევროპის ჩემპიონობასთან ერთად შარშან მსოფლიოს ჩემპიონის ტიტულიც მოიგო.

გააზიარეთ და მოიწონეთ სტატია: