გამოქვეყნდა გასაიდუმლოებული სტენოგრამა, რომელიც ასახავს 2001 და 2008 წლებში პუტინისა და ბუშის საუბრის დეტალებს

2008 წლის შეხვედრის დღეს გასაჯაროებულ ტრანსკრიპტებში ვლადიმერ პუტინი მკაცრად აფრთხილებს ჯორჯ ბუშსა და კონდოლიზა რაისს: “უკრაინის ნატოში მიღება რუსეთთან გრძელვადიანი კონფრონტაციის გარანტია იქნება”.

პუტინი: კარგი. “ახლა მსურს გავიმეორო ის, რაც მოსკოვში კონდის (კონდოლიზა რაისს) და რობერტ გეითსს ვუთხარი ნატოს გაფართოების შესახებ. ეს თქვენთვის ახალი არ იქნება და პასუხსაც არ დაველოდები; უბრალოდ მინდა ეს ხმამაღლა ვთქვა. მინდა ხაზი გავუსვა, რომ უკრაინის მსგავსი ( საქართველოსაც გულისხმობს) ქვეყნის ნატოში გაწევრიანება შექმნის გრძელვადიან პერსპექტივაში კონფლიქტის ველს თქვენთვის და ჩვენთვის, გრძელვადიან კონფრონტაციას.

პრეზიდენტი ბუში: რატომ?

პუტინი: “უკრაინაში 17 მილიონი რუსი ცხოვრობს — მოსახლეობის მესამედი. უკრაინა ძალიან რთული სახელმწიფოა. ეს არ არის ერი, რომელიც ბუნებრივი გზით ჩამოყალიბდა. ეს არის ხელოვნური ქვეყანა, რომელიც საბჭოთა პერიოდში შეიქმნა. მეორე მსოფლიო ომის შემდეგ უკრაინამ მიიღო ტერიტორიები პოლონეთისგან, რუმინეთისგან და უნგრეთისგან — ეს არის პრაქტიკულად მთელი დასავლეთ უკრაინა. 1920-იან და 1930-იან წლებში უკრაინამ მიიღო ტერიტორიები რუსეთისგან — ეს ქვეყნის აღმოსავლეთ ნაწილია. 1954 წელს ყირიმის ნახევარკუნძული გადაეცა უკრაინას”.

“ეს არის საკმაოდ დიდი ევროპული ქვეყანა, რომელიც 45 მილიონიანი მოსახლეობით შეიქმნა. ის დასახლებულია ადამიანებით, რომლებსაც ძალიან განსხვავებული აზროვნება აქვთ. თუ დასავლეთ უკრაინაში წახვალთ, ნახავთ სოფლებს, სადაც ერთადერთი სალაპარაკო ენა უნგრულია და ხალხს სპეციფიკური ქუდები ახურავთ. აღმოსავლეთში კი ადამიანებს აცვიათ პიჯაკები, ჰალსტუხები და დიდი ქუდები. უკრაინის მოსახლეობის დიდი ნაწილის მიერ ნატო აღიქმება, როგორც მტრული ორგანიზაცია”.

“ეს ქმნის შემდეგ პრობლემებს რუსეთისთვის: ქმნის რუსეთის სიახლოვეს სამხედრო ბაზებისა და ახალი სამხედრო სისტემების განლაგების საფრთხეს. ეს ჩვენთვის გაურკვევლობასა და საფრთხეებს ქმნის. უკრაინაში ნატოს საწინააღმდეგო ძალებზე დაყრდნობით, რუსეთი იმუშავებს იმაზე, რომ ნატოს გაფართოების შესაძლებლობა წაართვას. რუსეთი იქ მუდმივად შექმნის პრობლემებს. რისთვის? რა აზრი აქვს უკრაინის ნატოში წევრობას? რა სარგებელია ამაში ნატოსთვის და აშშ-ისთვის? ამის მხოლოდ ერთი მიზეზი შეიძლება არსებობდეს და ეს იქნება დასავლურ სამყაროში უკრაინის სტატუსის განმტკიცება — ასეთი იქნებოდა ლოგიკა. მე არ ვფიქრობ, რომ ეს სწორი ლოგიკაა; უბრალოდ ვცდილობ გავიაზრო. ნატოში გაწევრიანებაზე მოსახლეობის სხვადასხვა ნაწილის განსხვავებული შეხედულებების გათვალისწინებით, ქვეყანა შეიძლება უბრალოდ დაიშალოს. მე ყოველთვის ვამბობდი, რომ არსებობს გარკვეული პროდასავლური ნაწილი და გარკვეული პრორუსული ნაწილი. ახლა იქ ძალაუფლებას პროდასავლური ლიდერები ფლობენ. როგორც კი ისინი მოვიდნენ ხელისუფლებაში, თავადვე დაიყვნენ.

“პოლიტიკური აქტივობა იქ სრულად ასახავს მოსახლეობის განწყობებს. იქ საკითხი ნატოში გაწევრიანება კი არ არის, არამედ უკრაინის თვითმყოფადობის (თვითკმარობის) უზრუნველყოფაა. ასევე, მათი ეკონომიკა უნდა გაძლიერდეს.

მოსახლეობის სამოცდაათი პროცენტი ნატოს წინააღმდეგია. კონდიმ მითხრა, რომ სლოვაკეთსა და ხორვატიაში მოსახლეობა თავიდან წინააღმდეგი იყო, ახლა კი მომხრეა. რის წინააღმდეგიც ჩვენ ვართ, არის უკრაინის გაწევრიანება ნატოში.”