რა მოხდა 4 ოქტომბერს? – პაატა ბურჭულაძე პირველ განმარტებას აკეთებს

რა მოხდა 4 ოქტომბერს? – პაატა ბურჭულაძე პირველ განმარტებას აკეთებს.

სასახლის ღობის საქმეზე დაკავებული ბურჭულაძემ შესავალ სიტყვაში თქვა, რომ “მშვიდობიანი დამხობა შედგა 4 ოქტომბერს”. 

მისივე თქმით: “პასუხი იმისთვის, რაც მოხდა ათონელის რეზიდენციაში, გთხოვთ, მოჰკითხოთ ე.წ. მთავრობას”.

მსოფლიო ბანის განმარტებით, “ოცნება” ცდილობს, პატრიოტიზმი გამოაცხადოს კრიმინალად, ხოლო მათი ქცევა – ანუ, სამშობლოს ღალატი – გმირობად”.

რაც შეეხება ათონელის რეზიენციასთან განვითარებულ მოვლენებს, განსასჯელის სკამზე მყოფი ბურჭულაძე პირდაპირ ამბობს, რომ ” სასახლესთან, ხალხის წინააღმდეგ ჩადენილ პროვოკაციასაც ჰქონდა ადგილი”.

მსოფლიო ბანის სიტყვას  უცვლელად გთავაზობთ:

“პირველად მეძლევა საშუალება ჩემი დაკავების შემდგომ გესაუბროთ.
ოცნებას ყოველთვის აღიზიანებდა ტერმინი „მშვიდობიანი დამხობა“. ჩვენი გასამართლების მიზეზიც სწორედ ეს არის.

უნდათ, რომ ეს ფრაზა მონათლონ, როგორც ძალადობრივი მოქმედება და, მე, დღეს, მინდა გითხრათ, ბატონო მოსამართლევ, რომ მშვიდობიანი დამხობა შედგა 4 ოქტომბერს. შედგა დიდი წარმატებით, თავისუფლების მოედანსა და რუსთაველის გამზირზე გამართულ ეროვნულ კრებაზე.

ყველამ კარგად იცის, რომ არავითარ ძალადობას ადგილი არ ჰქონია და საქართველოს მოქალაქეებმა ერთხმად გადავირჩიეთ და დავამხეთ უკანონო ხელისუფლება, რუსი ოლიგარქის არალეგიტიმური რეჟიმი.
ხოლო პასუხი იმისთვის, რაც მოხდა ათონელის რეზიდენციაში, გთხოვთ, მოჰკითხოთ ე.წ. მთავრობას.

მეგობრებო, დაფიქრებულხართ, რომ როცა საუბარია 4 ოქტომბერზე, ე. წ. ხელისუფლება მხოლოდ ათონელის სასახლესთან არ შემდგარ რევოლუციაზე საუბრობს და არც ერთხელ არ ახსენებს რა მოხდა თავისუფლების მოედანზე და რუსთაველის გამზირის მთელს ტერიტორიაზე?

ეს იმიტომ, რომ ჩვენს ასობით-ათასიან სახალხო შეკრებაზე გაფორმდა დიქტატურის („ოცნების“) აბსოლუტური კრახი და იქ მათ ვერ მოახერხეს პროვოკაცია. 

ვერავინ ვერ იტყვის, რომ მოწოდება იყო ძალადობისკენ. 4 ოქტომბერს ჩვენ ყველანი ვიყავით მიწვეული ეროვნულ კრებაზე. ასე ცხადდებოდა ტელეეთერებიდან და ასე ეწერა მოსაწვევებზე, რომელსაც ჰქონდა ჩემი ხელმოწერა. 

ჩემი კარიერაც და ცხოვრებაც საჯაროა. ყველამ იცის ჩემი სამოქალაქო პოზიციაც, ჩემი საქმიანობაც, ჩემი შემოქმედებაც. მთელი ცხოვრება ქვეყნისთვის სამსახურს ვეწეოდი – სცენიდან, ქველმოქმედებით თუ საზოგადოებრივი საქმიანობით.

ახლა წამიყენეს აბსურდული ბრალდებები, რომ თითქოს მე ძალადობისკენ მოვუწოდებდი ხალხს. ყველასთვის ნათელია თუ რისთვის კეთდება ეს – ოცნება ცდილობს, პატრიოტიზმი გამოაცხადოს კრიმინალად, ხოლო მათი ქცევა – ანუ, სამშობლოს ღალატი –  გმირობად.

4 ოქტომბერს შედგა, პირველად საქართველოს ისტორიაში, ეროვნული კრება, ჩვენი, ქართველი ხალხის დამსახურებით. ეს ნამდვილად იყო შეკრება, სადაც მისმა უდიდებულესობამ, ქართველმა ხალხმა, გამოხატა საკუთარი ნება, რომ დაიცვას საქართველოს კონსტიტუცია.

4 ოქტომბერს, რუსთაველის გამზირზე იმყოფებოდა უპრეცედენტოდ ბევრი, 250 000-ზე მეტი ადამიანი. საქართველოს, არათუ ქალაქებიდან და რაიონებიდან, არამედ თითქმის ყველა სოფლიდან იყო წარმომადგენელი. მათ შორის, აფხაზეთიდან (გალის რაიონი) და სამაჩაბლოდან.

ასევე იყო უამრავი ემიგრანტი, ისინი, სპეციალურად, ამ დღისთვის ჩამოვიდნენ.
ასევე, კრებას ესწრებოდა საქართველოში მცხოვრები ყველა ეთნიკური უმცირესობის წარმომადგენელი.

ბევრ თქვენთაგანს დასწყდა გული რომ ბოლომდე ვერ მივაღწიეთ მიზანს, მათ შორის, მეც. ათონელის სასახლესთან, ვიცით, რა პროვოკაციასაც ჰქონდა ადგილი, ჩვენი ხალხის წინააღმდეგ. მე დღეს ვერ ვისაუბრებ ზუსტად მომხდარზე, რადგან დაკავების შემდგომ მოწყვეტილი ვარ გარესამყაროს, შესაბამისად მოკლებული სრულფასოვან ინფორმაციას, მაგრამ ამის გარკვევის დრო მალე დადგება.

თუმცა, ყველას შეგვიძლია ვიამაყოთ მიღწეულით; ჩვენი ერთობით, ენთუზიაზმით და პატრიოტიზმით. ჩვენ, ქართველმა ხალხმა, შევძელით გაგვეკეთებინა ის, რაც ოლიგარქიის ბანდამ ვერ შეძლო და ვერც შეძლებს, შვიდივე მილიარდი დოლარიც რომ დახარჯოს. ამიტომაც, დაიმახსოვრეთ, რომ 4 ოქტომბრის ეროვნული კრების შემდგომ, ჩვენ კი არ ვებრძვით არალეგიტიმურ მთავრობას, არამედ უზურპატორის ბანდა ებრძვის ხელისუფლებაში მყოფ საქართველოს ხალხს. – თქვა ბურჭულაძემ.

მსოფლიო ბანმა ის დეკლარაცია საკუთარ სასამართლოზეც წაიკითხა, რომელიც მან 4 ოქტომბერს თავისუფლების მოედანზე გააჟღერა.

დეკლარაცია:

“ჩვენ, საქართველოს მოქალაქეები, შეკრებილნი ეროვნულ კრებაზე, ვაცხადებთ:

ჩვენი სამშობლო აღმოჩნდა მიტაცებული. ე. წ. ხელისუფლებამ დაკარგა ხალხის ნდობა, სახელმწიფო ინსტიტუტები აღარ ასახავს ქართველი ხალხის ნებას.

საქართველოს კონსტიტუცია ამბობს, სახელმწიფოს ხელისუფლების წყარო არის ხალხი. დღეს, ხალხი იბრუნებს საკუთარ ძალაუფლებას უკან უზურპატორისგან, რათა დაიცვას მშვიდობა, უსაფრთხოება და ეროვნული ინტერესები. 

რუსი ოლიგარქის (ბიძინა ივანიშვილის) არაფორმალურმა მმართველობამ შექმნა რეალური საფრთხე საქართველოს სუვერენიტეტისათვისა და თითოეული მოქალაქისათვის.
ყოველივე ზემოთ თქმულიდან გამომდინარე, კენჭისყრაზე ვაყენებთ 3 საკითხს:

1. ეროვნული კრება აცხადებს, რომ ძალაუფლება მთლიანად ეკუთვნის ქართველ ხალხს;
2. ეროვნული კრება აცხადებს, რომ ე. წ. ხელისუფლებას, 26 ოქტომბრის გაყალბებული არჩევნებისა და საერთაშორისო არაღიარების შემდეგ, კონსტიტუციურად, დაკარგული აქვს ლეგიტიმაცია, ამიტომ მისი ძალაუფლება შეწყვეტილია;
3.ეროვნული კრება აცხადებს მშვიდობიან გარდამავალ პერიოდს, რომელიც უზრუნველყოფს ძალაუფლების მშვიდობიანად, საკუთარ ხელში აღებას დემოკრატიული ინსტიტუტების გათავისუფლებას, ევროკავშირთან გაწევრიანებისთვის დიალოგის მყისიერად აღდგენას, ქვეყნის უსაფრთხოებისა და მშვიდობიანობის დაცვას.”

პასუხი უნდა აგონ მოღალატეებმა, ნაცვლად იმ უდანაშაულო ადამიანებისა, ბავშვებისა, ვისაც ქუჩებიდან, სახლებიდან, ოჯახებიდან იტაცებენ. ისინი თავად ბოროტებას ემსახურებიან ჩრდილიდან – დევნის, დაშინების და დამორჩილების გზით. სწორედ ამ დამნაშავეების სია იყო ის, რაც სცენიდან იქნა წაკითხული და რის გამოც ჩვენ საპყრობილეში აღმოვჩნდით, მაგრამ დარწმუნებული ბრძანდებოდეთ, ეს დამნაშავეები პასუხს აგებენ კანონისა და ქართველი ხალხის წინაშე.

ქართველი ხალხის გეგმა იყო ათონელის ქუჩაზეც გაგვემართა მშვიდობიანი მიტინგი, რომელშიც მონაწილეობას მიიღებდნენ როგორც კრების დელეგატები, ასევე, დიდი ალბათობით, ველოდებოდით, სამართალდამცველებსაც და, შემდგომ, უამრავი ადამიანი მოვითხოვდით  პრეზიდენტის სასახლის გასაღების გადმოცემას, რაც უეჭველად მშვიდობიანად მოხდებოდა, რომ არა ის პროვოკაცია რაც მოაწყო ოცნებამ – ქართველი ხალხის წინააღდეგ. შედეგად კი უამრავი უდანაშაულო ადამიანია დაკავებული. ჩემი მხარდაჭერა ყველა პოლიტპატიმარს, აუცილებელია მათი დაუყოვნებლივ გათავისუფლება!

4 ოქტომბერს ჩემი წარმოთქმული სიტყვა არ შეიცავდა ძალადობის  ან ძალადობისკენ მოწოდების ნასახსაც კი. ამის დასტურია ის რომ ჩვენ ყველანი იქ ვიყავით შვილებთან და შვილიშვილებთან ერთად. ყველაფერი, რასაც ვაკეთებდით, ემსახურებოდა მხოლოდ და მხოლოდ მშვიდობიან გამოხატვას, რაც არის ჩვენი კონსტიტუციური უფლება.
ჩემი მიზანი იყო ის, რაც ჩემი მიზანია დღესაც – საქართველოში დემოკრატიული მმართველობის დამყარება, ხელისუფლების ცვლილება, ქართველი ხალხისგან მოტაცებული, წართმეული უფლებებისა და უფლებამოსილებების ხალხისთვის დაბრუნება.
4 ოქტომბერი – ეს დღე ჩავარდნის დღე კი არ არის, არამედ ერთიანობის, საზოგადოების მიერ ძალაუფლების მშვიდობიანად, ლეგიტიმურად ხელში აღების, გასაჭირში ერთად დგომის დღეა. ეს არის გამარჯვების დღე ბოროტებაზე.

გააზიარეთ და მოიწონეთ სტატია:

მსგავსი სტატიები:

პრემიერობის კანდიდატის შერჩევის პროცესში ივანიშვილი არ ჩარეულა – გია ვოლსკი გოცირიძე: ფინანსთა მინისტრმა დაადასტურა, რომ ბიუჯეტიდან 129 მილიონი ლარი მოიპარეს “ორი დღეა სოფლები პარალიზებულია და საკრებულოს სხდომა ხელფასების მატების საკითხზე ჩანიშნეს” „აზოველების“ არანაირი გაცვლა არ უნდა მოხდეს, მათი ბედი ტრიბუნალმა უნდა გადაწყვიტოს“ ფრაქცია „ნაციონალური მოძრაობის“ კვლევა – ბიუროკრატიული ხარჯების დიდი წილი სახელმწიფო სექტორში დასაქმებულთა ანაზღაურებაზე მოდის ბიორკის კონცერტი ჰამბურგში, SpaceX-ის კოსმოსური რაკეტის გაშვება, უიშვიათესი ჯიშის ახალშობილი მარტორქა ზოოპარკიდან – დღის ფოტოები მსოფლიოდან 조지아의 꿈은 북한의 악몽이다 (ქართული ოცნება – ჩრდილო კორეული კოშმარი) – ედიტორიალი ჩემი პროცესი არის 29-ში, მივიღე გადაწყვეტილება, არ მივიდე სასამართლოში – მელია