რუსეთის “ნათელი მომავალი” საქართველოსთან – რას ნიშნავს ეს დღეს

სწორედ რუსული „გორჩაკოვის“ ფონდისა და მისი შვილობილის, ქართულ-რუსული „პრიმაკოვის“ ფონდის ორგანიზებით გამართულ შეხვედრაზე გამოვიდა სიტყვით ყოფილი საგარეო საქმეთა მინისტრის მოადგილე, აწ უკვე პარლამენტარი, გრიგორი კარასინი, რომელმაც საქართველოს ხელისუფლებას საერთაშორისო სანქციებზე ნათქვამი უარი შეუქო.

კარასინთან შეხვედრის დროს გადაღებულ ფოტოებში ჩანს „პრიმაკოვის“ ფონდის ხელმძღვანელი, 5 ივლისის ძალადობრივ აქციებთან დაკავშირებული პოლიტიკოსი, დიმიტრი ლორთქიფანიძე. “პრიმაკოვის ფონდი” კრემლის ანტიდასავლურ ინტერესებს ემსახურება საქართველოში.

ქება მოსკოვში

უკვე მერამდენედ მოდის კმაყოფილების სიგნალი მოსკოვიდან, რომელიც უკავშირდება საქართველოს ხელისუფლების განცხადებებსა და უარს დასავლეთის მიერ რუსეთისთვის, უკრაინაში შეჭრის გამო, დაწესებულ მკაცრ სანქციებთან შეერთებაზე.

„პოსტსაბჭოთა სივრცეს ჩვენ განვიხილავთ როგორც ტრადიციულ მეგობრებს. დამყარებული ურთიერთობები ხასიათდება ერთმანეთის დახმარებით. რუსეთი მომხრეა, რომ ყველაფერს მშვიდად მიუდგეს. სანქციების რეჟიმები „წვრთნის“ რუსეთის სახელმწიფოს. ვინც ჩვენ პატიოსნად გვეპყრობა და ნიღბის გარეშე გველაპარაკება, ჩვენს მეგობრად დარჩება. უკრაინაში ვერ შედგა სახელმწიფოებრიობა. ჩვენთვის მიუღებელია, რომ ეს ქვეყანა გახდეს ნატოს წევრი“, – თქვა 24 მარტს, “გორჩაკოვის ფონდში”, ქართველ და რუს ექსპერტებთან შესახვედრად მისულმა გრიგორი კარასინმა, რუსეთის ფედერაციის საბჭოს საერთაშორისო საქმეთა კომიტეტის ხელმძღვანელმა და სახალინის სენატორმა, რომელიც რუსეთ-საქართველოს ორმხრივ მოლაპარაკებებში – ე.წ. პრაღის არაფორმალური დიალოგის აბაშიძე-კარასინის ფორმატში, რუსეთს წარმოადგენს.

საქართველოს პრემიერ-მინისტრის სპეციალურმა წარმომადგენლმა რუსეთთან ურთიერთობის საკითხებში ზურაბ აბაშიძიემ 25 მარტს „ინტერპრესნიუსს“ უთხრა, რომ ეს იყო კერძო ვიზიტი „ერთ-ერთი ქართული არასამთავრობო ორგანიზაციის მონაწილეობით“ და საერთო არაფერი აქვს პრაღის ფორმატთან. აბაშიძე ამბობს, რომ ასეთი ვიზიტი „არსებულ ვითარებაში“ მიზანშეწონილად არ მიაჩნია. საჯარო ინფორმაციის თანახმად, თავად აბაშიძესა და კარასინს შორის ბოლო შეხვედრა „პრაღის ფორმატში“ 2021 წლის ნოემბერში გაიმართა.

კარასინმა 24 მარტს თქვა, რომ საქართველოს პოზიცია რუსეთში „შეუმჩნეველი არ დარჩება” და ნათელ მომავალზე ისაუბრა.

„ჩვენს ურთიერთობებს აქვთ ნათელი მომავალი“ – რუსეთისა და საქართველოს „კავშირების“ შესახებ კარასინის მიერ წარმოთქმული ეს სიტყვები პირდაპირ სათაურში აქვს მოყვანილი „გორჩაკოვის ფონდს“. ქართველ “ექსპერტებთან, პოლიტოლოგებთან და მეცნიერებთან” გამართულ შეხვედრას საგანგებო ყურადღება დაეთმო როგორც რუსეთის ფედერაციის საბჭოს, ასევე რუსეთის საგარეო საქმეთა სამინისტროს ოფიციალურ ინტერნეტგვერდებზე.

საკუთარ ფეისბუკგვერდზე ინფორმაციას ავრცელებს დიმიტრი ლორთქიფანიძის ქართულ-რუსული საზოგადოებრივი ცენტრიც, რომელიც რუსეთის ყოფილი პრემიერ-მინისტრის, ევგენი პრიმაკოვის სახელს ატარებს და რომელიც, მკვლევრების შეფასებით, საქართველოში რუსული რბილი ძალის ერთ-ერთი ძირითადი საყრდენია.

ქართულად და რუსულად გამოქვეყნებულ ცნობაში ნათქვამია, რომ ღონისძიება 2-დღიანია და 24 მარტს, შეხვედრის ქართველ და რუს მონაწილეებს თავად ლორთქიფანიძემაც მიმართა.