კარგი იქნება, თუ პარლამენტში როიალი იქნება- გია ვოლსკი ელისო ბოლქვაძის ინიციატივაზე

უმრავლესობის წევრი, გია ვოლსკი ამბობს, რომ კულტურის სამინისტროს ცალკე გამოყოფას იგი მხარს უჭერს და ეს საკითხი უკვე დიდი ხანია განიხილება.

„მე აქტიურად დავუჭერ მხარს კულტურის სამინსიტროს გამოყოფას. ეს საკითხი პრეროგატივაა პრემიერის, ჩვენ მისგან ველოდებით საბოლოო გადაწყვეტილებას, თუმცა ამ თემაზე უკვე დიდი ხანია მიმდინარეობს მსჯელობა და საწინააღმდეგო პოზიცია აქამდე ამ საკითხზე არ მომისმენია“,- განაცხადა გია ვოლსკიმ.

ვოლსკი ელისო ბოლქვაძის ინიციატივასაც გამოეხმაურა, რომელმაც თქვა, რომ კარგი იქნებოდა, პარლამენტში როიალს თუ შეიტანდნენ.

„პარლამენტში თუ იქნება როიალი, თუ იქნება საშუალება რომ კულტურის მუშაკები, ბავშვები ხშირად მოდიოდნენ, კარგი იქნება. როიალზე შემსრულებელიც გვყავს და საკმაოდ ნიჭიერი ხალხია პარლამენტში მათ შორის უმცირესობაშიც და თუ სხვა რამეში გამოიჩენენ ნიჭს და არა დესტრუქციაში, კარგი იქნება“,- აღნიშნა ვოლსკიმ.

ცნობისთვის, პარლამენტის ახალი დეპუტატი, ელისო ბოლქვაძე ინიციატივით გამოვიდა, რომ პარლამენტში როიალი შეიტანონ, ის კი დაუკრავს.

„ვფიქრობ, რომ პარლამენტში შეიძლება, თუ არ არის ინსტრუმენტი, შეიძინონ  და ამაზე ვიფიქროთ, მეც დავუკრავ, უკეთესია, როდესაც მოცარტი და ბეთჰოვენი გაჟღერდება პარლამენტის კედლებში, მე ვფიქრობ, რომ მას მეტი სულიერება ექნება და მეტი ჰარმონია შემოვა ისეთ საკანონმდებლო ორგანიზაციაში, როგორიც არის პარლამენტი“,- ამბობს ბოლქვაძე.

გააზიარეთ და მოიწონეთ სტატია:
Pin Share