ეროვნული დემოკრატიული ინსტიტუტის (NDI) ყოფილი დირექტორი, გერმანიის მარშალის ფონდის ხელმძღვანელი ლორა თორნტონი საქართველოში მიმდინარე ანტიდასავლურ კამპანიას აღმაშფოთებელს უწოდებს და ამბობს, რომ ეს ქვეყნისთვის დამაზიანებელია.
როგორც მან “ამერიკის ხმასთან” ინტერვიუში აღნიშნა, მთავრობა ახლა გზაგასაყარზე დგას, სადაც მათ უნდა გადაწყვიტონ, ძალაუფლების შენარჩუნება და ბიძინა ივანიშვილის დაცვაა უფრო მნიშვნელოვანი, თუ მათი დასავლური ორიენტაციის მიზნები და დემოკრატია.
“პირდაპირ რომ ვთქვათ, ეს აღმაშფოთებელია. ვფიქრობ, რომ ეს აღმაშფოთებელი და დამაზიანებელია საქართველოსთვის. ამერიკა კარგად იქნება, მაგრამ საქართველო – არა. ეს მხოლოდ კონკრეტული პარლამენტის წევრები არ არიან, ეს ყველაფერი დიდი ხანია გრძელდება. კრიტიკა ევროკავშირის ელჩის, ევროპარლამენტარების, ამერიკის მისამართით, მოდიოდა [ირაკლი] კობახიძისა და სხვებისგან.
ჩემთვის გაუგებარია, რატომ უნდა გააკრიტიკო ისინი, ვისთან ყოფნასაც აპირებ. თუ თეორიულად შენი საგარეო პოლიტიკის მიზანია, რომ იყო ნატოსა და ევროკავშირის წევრი, რატომ კბენ იმავე ხელს, რომელიც გკვებავს? ეს არაფერში არ ჯდება, ვერ ვხვდები ამას რატომ აკეთებენ. სწორედ ამიტომაა, რომ შემდეგ ხალხი მიდის იმ დასკვნამდე, რომ იქნებ, მათ [საქართველოს მთავრობას] არ სურთ იყვნენ ნატოს, ევროკავშირის წევრები.
ისინი ამას საკუთარ თავს უკეთებენ. კამპანიის შექმნა, სადაც პარლამენტის 4 წევრია, რომლებიც ოფიციალურად არ არიან “ქართული ოცნების” წევრები და ასე ვთქვათ, მიშვებულები არიან, რომ ასეთი [კრიტიკული, მწვავე] ხედვები გააჟღერონ, სრულიად აბსურდულია ჩემთვის.
ვფიქრობ, რომ მთავრობა გზაგასაყარზე დგას, სადაც მათ უნდა გადაწყვიტონ, რა უფრო მნიშვნელოვანია მათთვის – ძალაუფლების შენარჩუნება და ბიძინა ივანიშვილის დაცვა, თუ მათი დასავლური ორიენტაციის მიზნები და დემოკრატია. ორივეს გაკეთება არ მგონია, რომ შეეძლოთ.
როდესაც ევროკავშირმა [საქართველოს] დეოლიგარქიზაციისკენ მოუწოდა, ამან ყველაფერი დაალაგა და ახლა გადაწყვეტილების მიღების დროა. თუმცა, არ ვიცი მთავრობას რას გადაწყვეტს”, – თქვა თორნტონმა.
კითხვას – მისი აზრით, რა არის ანტიდასავლური კამპანიის მიზანი და ხვდებიან თუ არა ამ პროცესში ჩართული ადამიანები, რამდენად საზიანოა ეს ყველაფერი, ლორა თორნტონმა ასე უპასუხა:
“ზუსტად ამიტომ ვთქვი, რომ დაბნეული ვარ. აკრიტიკებ [დასავლელ პარტნიორებს], ამბობ, რომ ამერიკის შეერთებული შტატები ბოლო 30 წლის განმავლობაში საქართველოს ვნებდა, როდესაც სინამდვილეში, ამერიკა საქართველოს ერთ-ერთი ყველაზე ახლო მოკავშირეა და ამ ქვეყნისთვის გაცემული აქვს რესურსები, ყურადღება და მხარდაჭერა. ასე რომ, როდესაც ასეთი კრიტიკა ისმის, მაშინ ვფიქრობთ: “კარგი, მათ კურსი შეიცვალეს”.
როდესაც ასეთ მოკავშირეს ასე, საჯაროდ აკრიტიკებ, მე ვიწყებ ფიქრს, რომ საგარეო პოლიტიკაში ცვლილებები იწყება. თუ არსებობს რაიმე სხვა ახსნა, სხვა მიზეზი, რატომ აკეთებენ ამას, მაშინ მისი გაგება მე არ შემიძლია.
მინდა მჯეროდეს, რომ ქვეყანას ისევ აქვს პრო-დასავლური ღირებულებები, მინდა ამის მჯეროდეს. თუმცა, ყველაფერი, რასაც ისინი [საქართველოს მთავრობა] აკეთებენ, საპირისპიროს მიუთითებს. ხალხის დასავლეთის წინააღმდეგ შემოტრიალება პირველი ნაბიჯია, რომელიც თუ უფრო ნეიტრალური, არამიმხრობითი სტატუსისკენ წავა, მაშინ ძალიან შემაშფოთებელი იქნება”, – თქვა მან.
მსგავსი სტატიები:
„იუნესკომ აღიარა ქართველების ახალი პატენტი – ბიძინას კარუსელი“ – ჩალაგაშვილი
თეა წულუკიანის ადგილმონაცვლე პარლამენტში ნინო იობაშვილია
გერმანიის შემდეგ, საქართველოს მოქალაქეები, შესაძლოა, სხვა ქვეყნებშიც დასაქმდნენ | ჩამონათვალი
“ლოკდაუნი არა, თუმცა არსებული რეგულაციების გამკაცრება განიხილება”
“მიშას კი არა, შენი სიკვდილიც კი არ მინდა, შე წვერებიანო @@@” – გვარამია ხაინდრავას
ჯავშნიანი მანქანები დაცვის პოლიციისთვის-შსს წელს ახალი, 3 მილიონიანი შესყიდვით იწყებს
უკრაინა არ არის რუსეთი. არც გახდება, ვერ მოესწრებიან – კუჩმა
დავალების შემსრულებელი მოსამართლე – რას პასუხობს ლაშა ჩხიკვაძე “ოცნების” სამხილებს