„სიმართლის მთქმელი“ 9 დეპუტატი და „ოცნება“ უმრავლესობის გარეშე

დეოლიგარქიზაციის კანონპროექტის გარშემო ატეხილი ვნებათაღელვის ფონზე, „ხალხის ძალას“ შეუერთდა მდიდარი დეპუტატი ვიქტორ ჯაფარიძე, რომელმაც ტელეკომპანია „პოს ტივის“ საკონტროლო პაკეტი შეიძინა და გააჩინა შეკითხვა – ხომ არ აკმაყოფილებს ის ოლიგარქის კრიტერიუმებს?

“ხალხის ძალას”, 4 ოქტომბერს, 13 ახალი წევრი შეემატა.

საერთაშორისო პარტნიორების, ძირითადად – ამერიკის ელჩისა და მთლიანად, აშშ-ის წინააღმდეგ დარაზმული მოძრაობა ისევ აცხადებს, რომ არ არის ანტიდასავლური ძალა, უბრლოდ, საქართველოს სუვერენიტეტისა და მშვიდობის სადარაჯოზე დგას. მათი მესიჯები კი ანალიტიკოსებისთვის საწინააღმდეგოზე მეტყველებს.

რა შეუძლიათ პარლამენტში?

მას შემდეგ, რაც „ქართული ოცნების“ შემადგენლობიდან „კულუარული სიმართლის სათქმელად“ კიდევ 5 დეპუტატი წავიდა და მოძრაობა „ხალხის ძალას“ შეუერთდა, სახელისუფლებო პარტია საპარლამენტო უმრავლესობას (სულ მცირე 76 დეპუტატი) ვეღარ ფლობს.

თეორიულად, ეს ნიშნავს იმას, რომ „ქართული ოცნება“ დამოუკიდებელად ვეღარ შეძლებს საკანონმდებლო ინიციატივების გატანას. კონსტიტუციონალისტი კონსტანტინე ჩოკორაია განმარტავს, რომ თეორიულად, „ხალხის ძალის“ დეპუტატები ახლა უკვე ვადამდელი არჩევნების დანიშვნის ბერკეტსაც ფლობენ.

„თუკი რაიმე მიზეზით მთავრობის დამტკიცების საკითხი დადგება პარლამენტის დღის წესრიგში, ვთქვათ – პრემიერ-მინისტრის გადადგომის შემთხვევაში, პარლამენტში კი უმრავლესობა არ იქნება, შესაძლოა, პარლამენტი დაშლამდე მივიდეს, რაც ვადამდელი არჩევნების დანიშვნის საფუძველს ქმნის“, – ამბობს ჩოკორაია.

ამ ეტაპზე, წასულებიც და დარჩენილებიც სრულ თანხმობას ადასტურებენ, უმრავლესობის რიგებში სიმბიოზური თანამშრომლობის პირობასაც დებენ და 4 ოქტომბერსაც უკვე მერამდენედ განმარტეს, რომ მათ შორის მხოლოდ მცირე განსხვავებაა: „ხალხის ძალა“ ასაჯაროებს კულუარულ ინფორმაციას, ხოლო „ქართული ოცნება“ საკუთარ თავს ამის უფლებას ვერ აძლევს.

მმართველი პარტიის წარმომადგენლებს არასოდეს უთქვამთ, რომ წასული დეპუტატების ნათქვამი სიმართლე არ არის, როცა ისინი წერილს წერილზე აქვეყნებენ და საქართველოს ომში ჩათრევის მცდელობაში საერთაშორისო პარტნიორებს და პირველ რიგში აშშ-ის ელჩს, კელი დეგნანს ადანაშაულებენ.

“ოცნებისა” და “ხალხის ძალის” ჰარმონიული თანამშრომლობის გათვალისწინებით, კონსტიტუციონალისტი კოტე ჩოკორაია არ მოელის, რომ „ხალხის ძალა“ „ქართულ ოცნებას“ ოდესმე განუდგება; თუმცა არ გამორიცხავს, რომ საპარლამენტო უმრავლესობის დაკარგვა “პოლიტიკურ პერფორმანსს” მოემსახუროს:

„შესაძლოა ამით „ქართული ოცნება“ დასავლეთს აჩვენებს, რომ აი, აღარ არიან უმრავლესობაში და მთლიანად პოლიტიკურ პასუხისმგებლობას ვეღარ აიღებენ ყველა გადასაწყვეტ საკითხზე და მათზე აღარ არის ეს დამოკიდებული, დამტკიცდება თუ არა ესა თუ ის საკითხი პარლამენტში“, – გვეუბნება ჩოკორაია და იქვე იხსენებს 2019 წლის ნოემბერს, როცა „მეამბოხე დეპუტატებმა“, პარლამენტში კენჭისყრისას, ჩააგდეს საკონსტიტუციო ცვლილება, რომელიც ბიძინა ივანიშვილის მიერ დაპირებულ სრულად პროპორციულ არჩევნებს გულისხმობდა.

გაფართოების შემდეგ, „ხალხის ძალის“ 9 დეპუტატს შორის უკვე 5 მაშინდელი „მეამბოხეა“.

გაფართოებული შემადგენლობით, უცვლელი მიზნით

„საფრთხეები არ არის მოხსნილი. საფრთხეები იქნება მანამდე, სანამ იქნება მცდელობა, რომ საქართველო ომში იქნეს ჩართული და ამაზე უფრო დიდ საქმეს, რომ საქართველოს სტაბილური განვითარების შანსი შევუნარჩუნოთ, ჩვენ ვერ გავაკეთებთ ჩვენი სამშობლოსთვის”, – თქვა „ხალხის ძალის“ დამფუძნებელმა სოზარ სუბარმა, 4 ოქტომბერს, ახალი წევრების წარდგენისას.

• “ქართული ოცნებიდან” გამოყოფილ ოთხეულს უერთდებიან დეპუტატები: ვიქტორ ჯაფარიძე; დაჩი ბერაია, ეკა სეფაშვილი; დავით კაჭარავა და ზაალ მიქელაძე.
• “ხალხის ძალას” ასევე შეუერთდნენ ტელეკომპანია „პოსტივის“ მედიასახეები და ექსპერტები, რომლებიც ხშირად ჩანდნენ იმავე „პოს ტივისა“ თუ „იმედის“ ეთერებში. ესენი არიან: თამთა მეგრელიშვილი; დავით ქართველიშვილი, ზურაბ ქადაგიძე; თამარ ჩიბურდანიძე, ნუკრი შოშიაშვილი, ოთარ ჭულუხაძე, ნიკა ქობულაძე და იოანე შაიშმელაშვილი.

„ხალხის ძალა“ აცხადებს, რომ ანტიდასავლურ მიზნებს არ ემსახურება და მხოლოდ საქართველოს სუვერენიტეტის სადარაჯიზე აპირებს დგომას.

ატლანტიკური საბჭოს აღმასრულებელი დირექტორი, გიორგი მუჩაიძე დარწმუნებულია, რომ ამ მოძრაობის წარმომადგენლების რიტორიკა საქართველოში ანტიდასავლურ განწყობების ზრდასა და შესაბამისად, დასავლურ ღირებულებებთან დაშორებას ემსახურება; მაშინ, როცა დღეს, „რუსეთის აგრესიისგან უკრაინის გადასარჩენად ყველაფერს აკეთებს სწორედ დასავლეთი და განსაკუთრებით – მთავარი სტრატეგიული პარტნიორი – შეერთებული შტატები“.

გიორი მუჩაიძის შეფასებით, ახლადშექმნილი მოძრაობა, „ქართულ ოცნებასთან“ ერთად, დასავლეთსაც აშანტაჟებს:

„ეჭვი არ მეპარება, რომ „ქართული ოცნება“ და ეს ჯგუფიც წარმოადგენს ბიძინა ივანიშვილის მიერ ორკესტრირებულ პოლიტიკურ ინიციატივას. მთელი ეს ინიციატივა ერთი კაცის ინტერესებზეა ორიენტირებული… ძალაუფლების შენარჩუნებაა მთავარი მიზანი და შანტაჟის ინსტრუმენტს იყენებს იმისთვის, რომ აირიდოს დემოკრატიული რეფორმები და უკუსვლისთვის მიღებული კრიტიკა და საბოლოოდ, შესაძლოა რუსეთის ნავში გადახტომითაც ევაჭროს დასავლეთს “, – ეუბნება რადიო თავისუფლებას გიორგი მუჩაიძე.

მაშინვე, როცა „სიმართლის მთქმელთა“ პირველმა ნაკადმა დატოვა „ქართული ოცნების“ რიგები, ექსპერტმა და ტელეწამყვანმა, არჩილ გამზარდიამ (რომელიც 2015 წლამდე „ქართულ ოცნებასთან“ თანამშრომლობდა) რადიო თავისუფლებასთან საუბრისას ივარაუდა, რომ იწყებოდა ბიძინა ივანიშვილის კონცეფციით წამოწყებული, გათვლილი „ახალი პროცესი“.

არის თუ არა ოლიგარქი „ხალხის ძალის“ რიგებში?

მას შემდეგ, რაც 4 ოქტომბერს გაირკვა, რომ „ხალხის ძალის“ ახალი და მდიდარი დეპუტატი, ვიქტორ ჯაფარიძე ტელეკომპანია „პოს ტივის“ საკონტროლო პაკეტის მფლობელი გახდა, ავტომატურად გაჩნდა შეკითხვა, ხომ არ აკმაყოფილებს ჯაფარიძე დეოლიგარქიზაციის კანონპროექტში ასახულ კრიტერიუმებს. ახლახან ინიცირებული კანონპროექტი „ქართულმა ოცნებამ“ პირდაპირ უკრაინულიდან თარგმნა.