3 აგვისტოს, დღის ოთხი საათისთვის მედიაში პირველი ცნობები გავრცელდა იმის შესახებ, რომ რაჭაში, კურორტ შოვთან დამანგრეველი მეწყერი ჩამოწვა და ერთ-ერთი სასტუმროს 16 სტუმარი დახმარებასა და ევაკუაციას ითხოვს.
24 საათში მეწყერს დადასტურებული ინფორმაციით 11 ადამიანის სიცოცხლე ემსხვერპლა. 30-მდე დაკარგულს ისევ ეძებენ. სტიქიის ზონიდან გამოყვანილია 200-ზე მეტი ადამიანი, დანგრეულია 2 ხიდი და რამდენიმე ათეული კოტეჯი აღარ არსებობს. მთლიანად შეცვლილია შოვის ლანდშაფტი.
რადიო თავისუფლებამ დროის ხაზზე დააალაგა, როგორ ვითარდებოდა მოვლენები იმ მომენტიდან, როცა მეწყერის ჩამოწოლის შესახებ ინფორმაცია გავრცელდა იმ დრომდე, სანამ 11 ადამიანის ცხედარს იპოვიდნენ მაშველები – ესაა რაჭის სტიქიის პირველი 24 საათი.
3 აგვისტო
15:10 – 112-ში პირველი ზარი შედის გადაუდებელი დახმარების მოთხოვნით. ამ დროს ასახელებს ჟურნალისტებთან საუბრისას საგანგებო სიტუაციების მართვის სამსახურის ხელმძღვანელი თემურ მღებრიშვილი დღის ბოლოს.
16:53 – “საქართველოს ამბები” ავრცელებს ინფორმაციას რაჭაში მეწყერის ჩამოწოლის შესახებ. მედია წერს, რომ მეწყერში 16 ადამიანია მოყოლილი და მათ გადაუდებელი დახმარება სჭირდებათ. როგორც „საქართველოს ამბებს“ ადგილობრივები ეუბნებიან, მეწყერში მოყოლილებს შორის 6 ბავშვია.
16:04 – მოქალაქე მაია ფირცხალაიშვილი ფეისბუკის პირდაპირ ჩართვაში სასტუმრო “სანსეტ შოვიდან” ყვება, რომ იმყოფება დამეწყრილ ადგილას, სადაც უკვე ერთი საათია ელოდებიან მაშველებს. კადრებში ჩანს რომ სასტუმროს ირგვლივ ღვარცოფია.
“ერთი საათი გავიდა, თუ მეტი არა და ველოდებით, მოლოდინის რეჟიმში ვართ” – ამბობს ღვარცოფის ფონზე მდგარი ქალი.
16:10 – მოქალაქე დავით მაღრაძე ფეისბუკის პირად გვერდზე ავრცელებს კადრებს შოვიდან, სადაც ჩანს როგორ ანგრევს და მიაქვს ადიდებულ მდინარეს ხიდი.
16:41 – მაია ფირცხალაიშვილი შოვიდან კიდევ ერთ ვიდეოჩართვაში საუბრობს იმაზე, რომ სამაშველო სამსახური იგვიანებს და სტიქიის ზონაში ხალხი პანიკაშია. მაია ფირცხალაიშვილი სამაშველო ვერტმფრენის ბორტზე სხვა დამსვენებლებთან ერთად ასვლას ამ დღის 8 საათისთვის წუთზე მოახერხებს.
16:50 – შინაგან საქმეთა სამინისტრო პირველ განცხადებას აკეთებს შოვში მეწყერის შესახებ – უწყება ამბობს, რომ მიღებულია არაერტი შეტყობინება, ადგილზე მობილიზებულია და ემატება ტექნიკა.
სასაზღვრო პოლიციის 2 ვერტმფრენით მიემგზავრებიან საგანგებო სიტუაციების მართვის სამსახურის მაშველები დანაყოფები – ეწერა განცხადებაში.
16:53 – შოვიდან ფეისბუკის პირად გვერდზე გივი გაბისიანი აქვეყნებს ვიდეოს, სადაც ჩანს ადიდებული მდინარე ჭანჭახი, რომელშიც ღვარცოფი მოდი. ვიდეოში ისმის ვარაუდი, რომ მდინარემ შეიძლება წაიღოს ხიდი.
18:18 – შსს-ს სტრატეგიული კომუნიკაციების დეპარტამენტის ხელმძღვანელი, ქეთი კოვზიაშვილი ფეისბუკის პირად გვერდზე აქვეყნებს სასაზღვრო პოლიციის ვერმფრენის ფოტოს და წერს, რომ ის უკვე რაჭაშია.
19:12 – კვლავ შსს-ს სტრატეგიული კომუნიკაციების დეპარტამენტის ხელმძღვანელი ფეისბუკის პირად გვერდზე წერს, რომ “სტიქიის ზონიდან უკვე გამოყვანილია 12 მოქალაქე, მათგან 5 ბავშვია! მიმდინარეობს აქტიური სამაშველო ღონისძიება.” ნახევრ საათში ქეთი კოვზიაშვილი ამ ინფორმაციას აახლებს – სტიქიის ზონიდან 40 ადამიანია გამოყვანილი. სამინისტროს ოფიციალურ საკომუნიკაციო არხებზე ამ დროისთვის ინფორმაცია სამაშველო ოპერაციის შესახებ განახლებული არ არის.
19:15 – ფორმულა ავრცელებს ვიდეოს, სადაც ჩანს როგორ ამოჰყავთ მოქალაქეებს ტალახის მასიდან ბავშვი.
19:45 – ღვარცოფმა ელექტროგადამცემი ხაზები დააზიანა, შოვს და სოფელ გლოლას ელექტროენერგია არ მიეწოდება.
19:58 – „მთავარ არხთან“ ინტერვიუში ადგილობრივი მცხოვრები თვითმხილველის მონაყოლს იხსენებს და ამბობს, რომ ადიდებულმა მდინარემ წაიღო მანქანა რომელშიც მძღოლი იჯა. „ერთმა თვითმხილველმა თქვა, ექვსი მანქანა, მათ შორის ჩემი მანქანაც წაიღოო, ერთ-ერთი მანქანა თავისი მძღოლითო“.
არცერთი სახელმწიფო უწყება მსხვერპლის შესახებ ინფორმაციას არ ადასტურებს.
20:09 – შინაგან საქმეთა სამინისტრო მეორე განცხადებას ავრცელებს. ამჯერად უწყება ამბობს, რომ სასაზღვრო პოლიციის ვერმფრენმა სამი რეიოსით სტიქიის ადგილიდან 70-მდე ადამიანი გამოიყვანა.
სამაშველო ღონისძიებას ხელმძღვანელობენ შს მინისტრის მოადგილეები, იოსებ ჭელიძე და გიორგი ბუთხუზი, ასევე საგანგებო სიტუაციების მართვის სამსახურის უფროსი – თეიმურაზ მღებრიშვილი.
22:03 – შინაგან საქმეთა სამინისტრო ადასტურებს ორი ადამიანის გარდაცვალებას და აზუსტებს, რომ სტიქიის ადგილას 400-მდე მაშველია გადაყვანილი.
22:05 – ონის მერია ავრცელებს ინფორმაციას სტიქიის შედეგების შესახებ.
ძლიერი წვიმის შედეგად ადიდებულმა მდ. ჭანჭახმა ქუთაისი(ჭომა)-ალპანა-მამისონის უღელტეხილის საავტომობილო გზის 136-ე კმ-ზე სარმის ხიდი და 139-კმ-ზე შოვის ხიდი (შოვი) წაიღო, რის გამოც გზის აღნიშნულ მონაკვეთებზე აკრძალულია ყველა სახის ავტოტრანსპორტის მოძრაობა. ადგილზე მობილიზებული იყო ტექნიკა და დაიწყო გაწმენდითი სამუშაოები – წერია მერიის განცხადებაში.
22:10 – სასაზღვრო პოლიციის ვერტმფრენები წყვეტენ მუშაობას ღამის ხედვის სისტემების არქონის გამო. მაშველების ნაწილი აგრძელებს სამძებრო სამუშაოებს.
22:23 – სტიქიის ზონაში ჩარჩენილი ბავშვების მამა მედიასთან ამბობს, რომ არ აქვს ინფორმაცია ოჯახის წევრების შესახებ და შიშობს, რომ ღამეს მისი მცირეწლოვანი შვილები ვერ გადაიტანენ.
„მეუღლე და სამი მცირეწლოვანი შვილი მყავს ჩარჩენილი. ვერ ვუკავშირდები. შოვის ტერიტორიაზე, კოტეჯებში იმყოფებოდნენ, რომელიც, როგორც მეუბნებიან, წალეკილი აქვს მეწყერს. არ ვიცი, რა ხდება. არც გვეუბნებიან. მივედი სამაშველოსთან, ხალხო, გამარკვიეთ მეთქი. იქ არიანო. ნახეს, არ ნახეს, გახიზნული არიან ტყეში, არ არიან – არაფერს გვეუბნებიან, ხალხო. რამე ქენით. ვერ გადაიტანენ ღამეს, ბავშვები არიან – 2 წლის, 3 წლის და 7-ის. ნუთუ არ გეცოდებათ ეს ბავშვები?! ძალიან გთხოვთ. ვერ ავწევთ ვერტმფრენებს, რადგან შუქი არ გვაქვს, რომ მივანათოთო“.
23:03 – სასტუმრო “სანსეტ შოვი” ავრცელებს ინფორმაციას, რომ მათი ყველა სტუმარი და თანამშრომელი უვნებლად გადაურჩა სტიქიას და ევაკუირებულია. განცხადების მიხედვით, წყალი 3 აგვისტოს დღის 4 საათისთვის ადიდდა.
11:43 – საჯარო რეესტრის ეროვნული სააგენტო ავრცელებს განცხადებას, სადაც ნათქვამია, რომ სააგენტოს 35 ამზომველი, რომლებიც მივლინებით იყვნენ შოვში, უსაფრთხოდ არიან, მათი დროებითი საცხოვრებელი კი სრულად განადგურებულია.
23:47 – ონის მუნიციპალიტეტის მერიაში შოვში მომხდარი სტიქიის შესახებ საგანგებო თათბირი იმართება.
შინაგან საქმეთა სამინისტროს მაღალჩინოსნები, ინფრასტრუქტურის მინისტრი, რაჭა-ლეჩხუმის და ქვემო სვანეთის სახელმწიფო რწმუნებული და მთავრობის ადმინისტრაციის რეგიონებთან ურთიერთობის დეპარტამენტის უფროსის მოადგილე მერიის შენობაში მსჯელობის შედეგად გადაწყვეტენ შექმნან ცხელი ხაზი, რომელიც 24 საათის განმავლობაში იმუშავებს. ონის მერიაში ჩატარებულ თათბირის შესახებ ინფორმაციას და ფოტოებს სხვადასხვა სამთავრობო უწყება ავრცელებს.
00:34 – საგანგებო სიტუაციების მართვის სამსახურის უფროსი,თემურ მღებრიშვილი ჟურნალისტებს ეუბნება, რომ დაკავშირება 50 ადამიანთან ვერ ხერხდება.
02:16 – ინფრასტრუქტურის მინისტრი, ირაკლი ქარსელაძე ამბობს, რომ იმ 50 ადამიანიდან, რომლებთნაც დაკავშირება ვერ ხერხდებოდა, 6 ადამიანი მაშველებმა იპოვეს და უსაფრთხოდ არიან.
4 აგვისტო
5:48 – მოძრაობა ბრაკონიერების წინააღმდეგ-ის წევრები დრონებით სამძებრო სამუშაოების შემდეგ ავრცელებენ ინფორმაციას, რომ თერმულმა კამერამ სტიქიის ზონაში რამდენიმე ადგილას დააფიქსირა ცოცხალი ორგანიზმები. დილის 7-ის ოც წუთზე მოძრაობის წევრები დროებით წყვეტენ სამძებრო სამუშაოებს, იმის გამო რომ ვერტმფრენი იწყებს ფრენას. 9 საათიდან ნებართვის გარეშე კვლავ აახლებენ მუშაობას.
6:51 – შსს-ს სტრატეგიული კომუნიკაციების დეპარტამენტის ხელმძღვანელი აქვეყნებს სასაზღვრო პოლიციის ვერტმფრენის კადრებს სტიქიის ზონიდან და წერს, რომ განახლდა ევაკუაცია.
9:40 – შინაგან საქმეთა სამინისტროს ინფორმაციით, დილის 6 საათიდან ამ დრომდე სასაზღვრო პოლიციის ვერტმფრენებმა შოვიდან კიდევ 140 ადამიანი გამოიყვანეს.
10:04 – საავტომობილო გზების დეპარტამენტი ავრცელებს ვიდეოებს შოვიდან, სადაც ჩანს როგორ მუშაობს ტექნიკა გზის გასაწმენდად.
10:37 – ინფრასტრუქტურის მინისტრი, ირაკლი ქარსელაძე ამბობს, რომ კვლავ ვერ უკავშირდებიან 35 ადამიანს.
11:51 – გარდაცვლილთა რაოდენობა 6-მდე იზრდება – შინაგან საქმეთა სამინისტრო ადასტურებს რომ ნაპოვნია კიდევ 4 ცხედარი. ამ დროისთვის დაკარგულად მიიჩნევა 30-ზე მეტი ადამიანი.
12:53 – მთავრობის ადმინისტრაცია ავრცელებს ფოტოებს, სადაც ჩანს რომ პრემიერ-მინისტრი ირაკლი ღარიბაშვილი რაჭაში ჩავიდა და ცენტრალური და ადგილობრივი ხელისუფლების წარმომადგენლებთან ერთად თათბირი გამართა. კადრებში ჩანან სამთავრობო უწყებების პრეს-სამსახურების ხელმძღვანელები, ასევე სასულიერო პირები და დეპუტატები მმართველი ოცნებიდან.
მთავრობის ადმინისტრაციის მიერ გავრცელებული კადრების მიხედვით ღარიბაშვილი ონშია და არა შოვში, სტიქიის ზონაში. შოვში პრემიერი მხოლოდ სტიქიის დაწყებიდან 24 საათის შემდეგ, 6-ის 5 წუთზე გამოჩნდება – დამეწყრილ ადგილს ის იმ ვერტმფრენით სტუმრობს, რომელსაც მაშველები ევაკუაციისთვის იყენებენ.
14:11 – პრემიერ-მინისტრი ირაკლი ღარიბაშვილი ჟურნალისტებს ეუბნება , რომ გარდაცვლილთა რაოდენობა 7-მდე გაიზარდა. ამავდროულად, ის გლოვის დღედ აცხადებს ორშაბათს, 7 აგვისტოს და სამაშველო ოპერაციაში რთავს თავდაცვის ძალებს. ღარიბაშვილი დადებითად აფასებს სამაშველო ოპერაციას და ამბობს რომ ყველა, ვინც სტიქიის ზონაში იყო ნაპოვნი 4 აგვისტოს ღამეს უსაფრთხოდაა გამოყვანილი
15: 30 – ნიკორწმინდელი ეპისკოპოსი ვახტანგი და ეპარქიის სასულიერო პირები სტიქიის ზონაში მიდიან.
15:55 – 11 -მდე გაიზარდა დაღუპულთა რაოდენობა.
16:08 – ადგილობრივი მოსახლეობა ფეისბუკზე შოვიდან ავრცელებს ვიდეოს, სადაც ჩანს როგორ აწყვია ტყის პირას შავ პარკებში შეკრული გვამები – ვიდეოში ისმის ახალგაზრდა კაცის ხმა, რომელიც რეკავს სახელმწიფო უწყებებთან და ითხოვს წაიღონ დილას ნაპოვნი ცხედრები. 4 აგვისტოს ნაპოვნ ცხედრებს 17:15 წუთზე გადაასვენებს ვერტმფრენი სტიქიის ზონიდან.
მსგავსი სტატიები:
ჰანს კლუგე – გვირაბის ბოლოს სინათლე შეინიშნება, რადგან უკვე არსებობს იმედი ვაქცინის მიღებაზე, მაგრამ ამას მაინც დასჭირდება დრო
გიორგი გახარია დუმილს არღვევს!
დღეიდან ტურიზმის სექტორის წარმომადგენლებისთვის ვაქცინაცია რეგიონებშიც იწყება
“იმისთვის, რომ ეპიდსიტუაციის გაუარესება შევაჩეროთ, მოსახლეობის 30%-ის აცრა აუცილებელია”
ჩვენი ქვეყნის მესამე პრეზედენტს ვთხოვ, შეწყვიტოს შიმშილობა!-კულუმბეგოვი
14 იანვრის კოვიდსტატისტიკა
უკრაინის შეიარაღებულმა ძალებმა რუსეთის არმიის გენშტაბის უფროსის მოადგილე მოკლეს
გადავწყვიტეთ, სოფო ჭყონიასთან ერთად ჩამოვაყალიბოთ უკრაინაში დაკარგული ბავშვების დახმარების საერთაშორისო პროგრამა – სააკაშვილი