საქართველოში მოქმედი სამოქალაქო საზოგადოების ორგანიზაციები აცხადებენ, რომ აგრძელებენ სამართლებრივ ბრძოლას „აგენტების კანონის“ წინააღმდეგ. 30 მაისს გამართულ ერთობლივ ბრიფინგზე მათ განაცხადეს, რომ შიდა და საერთაშორისო მექანიზმებს გამოიყენებენ კანონის მოქმედების შესაფერხებლად. ორგანიზაციები საქართველოს საკონსტიტუციო სასამართლოში წარსადგენად სარჩელს ამზადებენ.
„ქართული არასამთავრობო ორგანიზაციები ვაგრძელებთ სამართლებრივ ბრძოლას რუსული კანონის წინააღმდეგ. ჩვენ ვაცხადებთ, რომ რუსული კანონის წესებით არ ვიცხოვრებთ და გამოვიყენებთ ყველა შიდა და საერთაშორისო მექანიზმს მისი მოქმედების შესაფერხებლად კანონის უპირობო გაუქმებამდე. ამისათვის, ვამზადებთ სარჩელს საქართველოს საკონსტიტუციო სასამართლოში წარსადგენად და უახლოეს პერიოდში მივმართავთ მას. საკონსტიტუციო სასამართლოს შეუძლია იმოქმედოს კონსტიტუციით მინიჭებული უფლებამოსილებით და შეაჩეროს კანონის შესაბამისი მუხლების მოქმედება, – აღნიშნავენ არასამთავრობო ორგანიზაციები, რომლებიც, ამავე დროს, ევროსასამართლოში საჩივრის შესატანად ემზადებიან, – საკონსტიტუციო სასამართლოს არ მივიჩნევთ ერთადერთ გზად ჩვენი სამართლებრივი ბრძოლისათვის. იმ შემთხვევაში, თუ საკონსტიტუციო სასამართლო არ იმოქმედებს დროულად და კონსტიტუციურ ჩარჩოებში, ჩვენ გამოვიყენებთ ალტერნატიულ სამართლებრივ მექანიზმს. პარალელურად ვემზადებით ადამიანის უფლებათა ევროპულ სასამართლოში საჩივრის წარსადგენად, რომელსაც მივმართავთ შესაბამის დროს“.
განცხადების ავტორები აღნიშნავენ, რომ ყველა არასამთავრობო და მედიაორგანიზაციას შეუძლია ამ ბრძოლის მონაწილე გახდეს და შეუერთდეს მას.
„ჩვენ ერთად გავიმარჯვებთ. არა რუსულ კანონს! კი ევროპას!“ – ამბობენ სამოქალაქო საზოგადოების წარმომადგენლები.
28 მაისს პარლამენტის მიერ „აგენტების კანონზე“ პრეზიდენტის ვეტოს დაძლევის შემდეგ, არასამთავრობო ორგანიზაციებმა განაცხადეს, რომ არ აპირებენ კანონს დაემორჩილონ.
28 მაისს საქართველოს პარლამენტმა არ გაიზიარა პრეზიდენტის მოტივირებული შენიშვნები და „აგენტების კანონზე“ დადებული ვეტო დაძლია. კანონს ათობით ათასი მოქალაქე თბილისსა და საქართველოს სხვა ქალაქებში 55 დღის განმავლობაში აპროტესტებდა.
„აგენტების კანონზე” პრეზიდენტის ვეტოს დაძლევამდე რამდენიმე დღით ადრე, 23 მაისს, სახელმწიფო მდივანმა ენტონი ბლინკენმა გამოაქვეყნა გადაწყვეტილება: „საქართველოში დემოკრატიისთვის ძირის გამოთხრის გამო სავიზო შეზღუდვების პოლიტიკის გამოცხადება და აშშ-საქართველოს თანამშრომლობის ყოვლისმომცველი გადახედვა”.
ვაშინგტონმა გადაწყვიტა, რომ სავიზო შეზღუდვებს დაუწესებს „ქართული ოცნების” ხელისუფლების წარმომადგენლებს, რომლებიც დემოკრატიას ძირს უთხრიან, და მათი ოჯახის წევრებსაც. ჯერჯერობით არცერთი კონკრეტული პირი დასახელებული არ არის. გარდა ამისა, აშშ გადახედავს საქართველოსთან თანამშრომლობას. მიზეზი „უცხოური გავლენის გამჭვირვალობის” კანონი და მასთან დაკავშირებული მოვლენებია, მათ შორის „პროტესტის ჩახშობის მიზნით გამოყენებული რეპრესიული ტაქტიკა”.
მსგავსი სტატიები:
ნიკა მელია გისოსებს მიღმა “ნაცმოძრაობამ” მოახვედრა – გია ვოლსკი
თურნავა ნამახვანჰესზე: ჩვენი გეგმა ცნობილია, მომავალი კვლევები ნდობას გააჩენს
ოზურგეთში Pfizer-ით ვაქცინაცია დაიწყო- გურიის რეგიონისთვის გამოყოფილი ყველა დოზა უკვე დაჯავშნილია
მივდივარ რუსთავში – სააკაშვილის მკურნალი ექიმი ციხეში შეუშვეს
„წინ კიდევ 43 კონცერტი და 35 ქალაქია“ – ანსამბლი „სუხიშვილები“ უკრაინაში ტურნეს გამართავს
”ოზურგეთში “ქართული ოცნების” გაზულუქებული ჩინოვნიკები მოგვიქსიეს” – ლევან ხაბეიშვილი
ამერიკელი ექსპერტ-ტოქსიკოლოგი -“მე ვთვლი…რომ ის მოიწამლა ციხეში და არა სამედიცინო დაწესებულებაში”
„პუტინის გეგმების კრახი და სერიოზული საფრთხე“ – ვიტალი ბარაბაშმა ავდიივკას მახლობლად არსებულ ვითარებაზე ისაუბრა