ანაკლიის პორტის ჩინური კომპანიისთვის გადაცემა – ნაღმია ქვეყნის უსაფრთხოებისთვის – „სამოქალაქო იდეის“ დამფუძნებელი

ანაკლიის ჩინური კომპანისთვის გადაცემა ქვეყნის უსაფრთხოებისთვის ნაღმების ჩადება იქნება – ამის შესახებ „სამოქალაქო იდეის“ დამფუძნებელი თინა ხიდაშელი “ტვ პირველისთვის” მიცემულ ინტერვიუში საუბრობს.

ექსპერტი “ქართულ ოცნებას” აფრთხილებს, გაიაზრონ, ის უმძიმესი პერსპექტივა, რომელშიც ქვეყანა აღმოჩნდება, თუკი ანაკლიის პორტის პროექტს აშშ-ის მიერ სანქცირებული ჩინური კომპანია  China Communications Construction Company ააშენებს:

მთავრობას პირობა აქვს დადებული, რომ აპრილის დასაწყისში იურიდიული დოკუმენტაცია უნდა გააფორმოს ჩინურ კომპანიასთან და გადასცეს ანაკლია. ეს იქნება ძალიან დიდი ხნით, ამ ქვეყნის უსაფრთხოებისთვის ნაღმების ჩადება. გრძელვადიანი უსაფრთხოებისთვის ანაკლიის გადარჩენა ახლა პრინციპულად მნიშვნელოვანია და იმედი მაქვს, რომ “ქართული ოცნება” მისთვის ჩვეული სიჯიუტით და სითავხედით არ მიუდგება ამ განცხადებას და სერიოზულად შეხედავს იმ უმძიმეს პერსპექტივას, რომელშიც ქვეყანა აღმოჩნდება, თუკი მათ მოახდინეს ხელშეკრულების ხელმოწერა”- აღნიშნავს თინა ხიდაშელი. 

„სამოქალაქო იდეის“ დამფუძნებელი პირდაპირ ამბობს, რომ თუკი, “ქართულმა ოცნებამ” აშშ-ის გზავნილი არ გაითვალისწინა, ეს ახალი სანქციების საფუძველი გახდება.

აუცილებლად იქნება ახალი სანქციების საფუძველი არა მარტო მისთვის (ლევან დავითაშვილისთვის) არამედ ასევე მთავრობის იმ წევრებისთვის, რომლებიც ამ შავი ზღვის რეგიონში ჩინური ინტერესის გაძლიერებას მხარს დაუჭერენ, მაგრამ ეს საქართველოს ვეღარ უშველის. ეს იქნება ყველაზე დიდი ანტისახელმწიფოებრივი ნაბიჯი, რაც შეიძლება ლევან დავითაშვილმა პირადად და ამ მთავრობამ გადადგას. ამიტომ არის ძალიან მნიშვნელოვანი, რომ იმის მიუხედავად ამას რა მოჰყვება, გადავარჩინოთ დღეს ანაკლია”- დასძინა ექსპერტმა. 

„ეკონომიკური პოლიტიკის კვლევის ცენტრის“ უფროსი მკვლევარი, გიგი გიგიაძე ამბობს, რომ “ქართულ ოცნებას” გადაწყვეტილი აქვს, რომ ანაკლიის პორტში ამერიკული, ევროპული ან დასავლური ინვესტიციები არ განხორციელდეს.

ექსპერტის შეფასებით, ხელისუფლების ცვლილების შემდეგ ანაკლიის ღრმაწყლოვანი ნავსადგურის პროექტი ხელახლა უნდა გადაიხედოს.

მათ უკვე მიღებული აქვთ გადაწყვეტილება რომ არ დაუშვან ანაკლიის პორტში ამერიკული, ევროპული ან დასავლური მონაწილეობა, ეს თავიდანვე ცხადი იყო, როდესაც  უარი ეთქვა პორტის განვითარებას.

მიღებულია გადაწყვეტილება რომ სავარაუდოდ ეს იქნება რაღაცა არა დასავლური კონტაქტი, დიდი ალბათობით ეს იქნება ჩინეთი, რაც არის ძალიან დიდი შეცდომა და ემსახურება მხოლოდ საქართველოს უსაფრთხოების დასუსტებას და არა პირიქით. 

როდესაც საქართველოში დაბრუნდება ეროვნული ხელისუფლება,  აუცილებელი იქნება ანაკლიის პორტის ხელახლა გადახედვა, ამ საკითხის ხელახლა გადახედვა და იმ პოტენციალის გამოყენება, რომელიც ამ პორტს გააჩნია ჩვენს რეგიონში”- დასძინა მან. 

“ლელო-საქართველოსთვის” ლიდერი, ბადრი ჯაფარიძე აცხადებს, რომ ანაკლიის პროექტის განხორციელება  შეერთებული შტატების სტრატეგიულ ინტერესებში შედის, რაც საბოლოოდ საქართველოს უზარმაზარ შესაძლებლობას მისცემს.

ეს პროექტი არის შეერთებული შტატების სტრატეგიულ ინტერესებში, რომ ამ პროექტის განხორციელებაში უნდა მიიღოს მონაწილეობა ამერიკულმა კაპიტალმა, დასავლურმა კაპიტალმა, ის უნდა განხორციელდეს დასავლური სტანდარტებით და ეს მისცემს საქართველოს უზარმაზარ შესაძლებლობას, რომ მნიშვნელოვანი სტრატეგიული დერეფანი გახდეს, აღმოსავლეთსა და დასავლეთს შორის, მაგრამ საქართველოს ინტერესების დაცვით. 

საქართველოს ინტერესებშია სწორედ ეს პროექტი განხორციელდეს დასავლური კაპიტალით. თუკი სანქცირებული კომპანია იღებს მონაწილეობას ინფრასტრუქტურული პროექტის განხორციელებაში, ეს პროექტი უკვე  თავისთავად ხდება სანქციების რისკის ქვეშ, ამიტომ  ეს იქნება პირდაპირი დარტყმა საქართველოს ინტერესებისადმი, თუკი შეერთებული შტატების მიერ სანქცირებულმა კომპანიამ განახორციელა ანაკლიის ღრმაწყლოვანი პორტის პროექტი”- განმარტავს ჯაფარიძე.

აშშ-ის ჰელსინკის კომისიის წევრები „ქართული ოცნების” გადაწყვეტილებას ანაკლიის პორტის მშენებლობის უფლების ჩინური კონსორციუმისთვის გადაცემასთან დაკავშირებით საგანგებო განცხადებით 2 აპრილს გამოეხმაურნენ.

განცხადების ავტორები შეშფოთება გამოხატავენ, რომ პორტის განვითარებას უხელმძღვანელებს კომპანია, რომელიც აშშ-ის მიერ არის სანქცირებული და აღნიშნავენ, რომ ეს გავლენას მოახდენს  საქართველოს მომავალზე.

• ჰელსინკის კომისიის მიერ გავრცელებულ განცხადებას კომისიის თავმჯდომარე, როჯერ უიკერი ( უიკერი ტრამპის უახლოესი გარემოცვის წევრია). თანათავმჯდომარე, ჯო უილსონი, სენატორი შელდონ უაითჰაუსი, სენატორი ჯონ კორნინი, ასევე, სტივ კოენი და მარკ ვისი უერთდებიან.

ჩინური კომპანია, რომელმაც ანაკლიის პორტი უნდა ააშენოს, აშშ-ის მიერ არაერთგზის არის სანქცირებული.

China Communications Construction Company Limited (China) – CCCC იმ კონსორციუმში შემავალი კომპანიაა, რომელიც “ქართულმა ოცნებამ” ანაკლიის ღრმაწყლოვანი ნავსადგურის პროექტის კერძო პარტნიორად შეირჩა.