ჟურნალისტი რომან პერლი, რომელსაც რუსეთში აგენტების კანონის მიღების შემდეგ ქვეყნის დატოვება მოუწია, ქართველ ხალხს მოუწოდებს, არ დანებდნენ და კანონპროექტის მიღებას წინააღმდეგობა “ბოლო წუთამდე” გაუწიონ.
რომან პერლი რადიო თავისუფლების პროექტის ნასტაიაშეე ვრემიას ჟურნალისტი იყო. კანონის მიღების შემდეგ კი უცხოელ აგენტად გამოაცხადეს.
სოფო ზურაბიანის პოლიტიკის ფორმულაში მან თავის გამოცდილებაზე ისაუბრა და აღნიშნა, რომ რუსეთში ეს ბრძოლა წაგებულია, საქართველოში კი სანამ შესაძლებლობაა, ხალხმა იქამდე უნდა იბრძოლოს.
“საზოგადოებას ვურჩევ, წინააღმდეგობა გაუწიონ ბოლო წუთამდე იმიტომ, რომ ეს არის ზღვარი, რომლის იქით უკვე აზრიც აღარ ექნება წინააღმდეგობას. როგორც რუსეთში მოხდა. რუსეთშიც იყო ზღვარი 2011-2012 წელი. ამის შემდეგ აღმოჩნდა, რომ პროტესტს უკვე არაფრის მოტანა არ შეეძლო. სანამ არის შესაძლებლობა, გაუწიოთ წინააღმდეგობა არსებულ ავტოკრატიას, მას უნდა შეეწინააღმდეგო. არსებობს რისკი, მაგრამ თუ არსებობს შესაძლებლობა ბრძოლის, სჯობს ბრძოლა, თუმცა ჩემგან, როგორც რუსეთის მოქალაქისგან ეს შესაძლებელია ისე არ ჟღერდეს იმიტომ, რომ ჩვენ ჩვენი ბრძოლა წავაგეთ”- თქვა მან.
***
ქართული ოცნებიდან ფორმალურად წასულმა დეპუტატებმა, რომლებიც საკუთარ თავს “ხალხის ძალას” უწოდებენ, დააინიციირეს კანონპროექტი, რომელიც საქართველოში “უცხოური გავლენის აგენტებს” გააჩენს. ეს კანონი შეეხება ყველას, ვინც ხელისუფლებას აკრიტიკებს. “უცხოური გავლენის აგენტებად” დარეგისტრირდებიან ორგანიზაციები და მედიასაშუალებები, რომელთა შემოსავლის 20%-ზე მეტი უცხოური წყაროა.
ქართული ოცნება მხარს უჭერს კანონპროექტს. მმართველ პარტიაში აცხადებენ, რომ მსგავსი კანონი აშშ-შიც მოქმედებს, ამავე არგუმენტს იყენებდა რუსეთიც. თუმცა ისინი მანიპულირებენ, როდესაც ამერიკული კანონის მოქმედების დეტალებზე არ საუბრობენ. ამერიკული კანონი სხვა სახელმწიფოების პოლიტიკური ლობიზმის გამოსავლენადაა მიმართული, განსხვავებით ქართული ოცნების რუსული კანონისგან.
მმართველი პარტიის წევრები რუსულ კანონში პრობლემას ვერ ხედავენ, თუმცა კანონპროექტს აკრიტიკებენ საერთაშორისო პარტნიორები, სამოქალაქო საზოგადოების წარმომადგენლები და სხვადასხვა ქვეყნის ელჩები.
კანონპროექტის შესახებ აშშ-ის სახელმწიფო დეპარტამენტის პრესსპიკერმა, ნედ პრაისმა განაცხადა, რომ რუსული კანონი უცხოური გავლენის აგენტებზე სტიგმატიზებას მოახდენს და “გააჩუმებს საქართველოს მოქალაქეების დამოუკიდებელ ხმებს”.
28 თებერვალს კი აშშ-ის სახელმწიფო დეპარტამენტმა გაავრცელა ინფორმაცია, რომ სახელმწიფო მდივნის თანაშემწემ ერინ ბარკლიმ ჟენევაში საქართველოს საგარეო საქმეთა მინისტრს შეხვედრისას უთხრა, რომ კანონპროექტი, რომელიც არასამთავრობო ორგანიზაციებისა და მედიის წინააღმდეგაა მიმართული “საქართველოს ევროინტეგრაციას ძირს გამოუთხრის”.
რუსულ კანონზე საქართველოში ამერიკის ელჩმა, კელი დეგნანმა განაცხადა, რომ კანონპროექტის მიზანი სამოქალაქო საზოგადოების სტიგმატიზაციაა. ის გააკრიტიკა საქართველოში ევროკავშირის ელჩმაც და აღნიშნა, რომ კანონი ევროკავშირის 12 პრიორიტეტთან შეუთავსებელია. რუსულ კანონს გამოეხმაურა ევროკავშირის საგარეო უწყებაც და განაცხადა, რომ ეს შემაშფოთებელია.
ამას Twitter-ზე გამოეხმაურა ნორვეგიის საგარეო საქმეთა სამინისტროც და განაცხადა, რომ კანონი ქვეყნების თანამშრომლობაზე უარყოფითად აისახება. უწყების თქმით, კანონპროექტი ეწინააღმდეგება ქართველი ხალხის მტკიცე ევროპულ მისწრაფებებსა და ადამიანის უფლებების საერთაშორისო ვალდებულებებს. ნორვეგიამ კანონმდებლებს მოუწოდა, საქართველოს დემოკრატიის ინტერესებიდან გამომდინარე იმოქმედონ.
კანონპროექტი გააკრიტიკა ევროპის საბჭოს ადამიანის უფლებათა კომისარმა – მან საქართველოს პარლამენტის თავმჯდომარეს, შალვა პაპუაშვილს ოფიციალური წერილით მიმართა და მოუწოდა, კანონის მიღებაზე უარი თქვას. მისი განცხადებით, კანონს, შესაძლოა, სერიოზული მსუსხავი ეფექტი ჰქონდეს ადამიანის უფლებების, დემოკრატიისა და კანონის უზენაესობის სფეროში აქტიურად მომუშავე არასამთავრობო ორგანიზაციათა საქმიანობაზე.
მსგავსი სტატიები:
“თუ ივანიშვილი მელიას არ გაათავისუფლებს, მისი ქონების უმეტესი ნაწილი იქნება გაყინული და ჩამორთმეული”
ბათუმი-სარფის დამაკავშირებელ გზაზე კლდე ჩამოიშალა
“პირდაპირ ბიძინა ივანიშვილს მივმართავ-რას აკეთებ?”
ვარყიოთ რეჟიმი ყოველდღიურად და მტკიცედ, სანამ არ ჩამოინგრევა! – ნიკა მელია
ცხენის წინ მოხტუნავე კვიცის პოზიციაში არ აღმოვჩნდეთ… კოლექტიურად უნდა ვიმოქმედოთ-კახაძე უკრაინაზე
რუსეთის მიერ უკრაინაში შეჭრის გამო, ცნობილმა რუსმა ბალერინამ ოლგა სმირნოვამ მოსკოვის დიდი თეატრი დატოვა
სამედიცინო მანიპულაციების ჩასატარებლად, მიხეილ სააკაშვილი ეტლით სარგებლობს – ვივა მედში კვლევები დასრულდა
ოზურგეთში გურიის ეროვნული პარკის დაარსების პროექტთან დაკავშირებით საინფორმაციო შეხვედრა გაიმართა