სამშენებლო კომპანია “არქის” მფლობელმა გამჭვირვალობის კანონს მხარდაჭერა გამოუცხადა – ილია წულაიას განცხადება რამდენიმე საათის წინ გავრცელდა.
ბიზნესმენი ამტკიცებს, რომ “დღეს საქართველოში ბიზნესი გამჭვირვალეა, მნიშვნელოვანია გამჭვირვალობა ნებისმიერ სხვა სექტორში, მათ შორის არასამთავრობო სექტორში”.
წულაია “ქართულ ოცნებას” აქებს და ირწმუნება, რომ ევროპული ოჯახის წევრობისთვის, “სწორედ დღევანდელ ხელისუფლებასთან ერთად გადაიდგა არაერთი მნიშვნელოვანი ნაბიჯი“.
„მოგესალმებით, მეგობრებო, პირველ რიგში, გილოცავთ ბზობის ბრწყინვალე დღესასწაულს!
მე, როგორც „არქის“ დამფუძნებელი და ქართული ბიზნესის წარმომადგენელი, ვფიქრობ, საჭიროებაა იმისა, რომ დავაფიქსირო ჩემი შეხედულება ქვეყანაში მიმდინარე მოვლენებთან დაკავშირებით.
პირველ რიგში, აღვნიშნავ, რომ ევროპა და ევროპული ღირებულებები პირადად ჩემი და ჩვენი ქვეყნის უალტერნატივო არჩევანია. ქართველი ხალხის აბსოლუტური უმრავლესობის მიზანია, გახდეს ევროპის დიდი ოჯახის ნაწილი, რის მისაღწევადაც, ქართველ ხალხთან ერთად, სწორედ დღევანდელი ხელისუფლების მიერ გადაიდგა არაერთი უმნიშვნელოვანესი ნაბიჯი: ასოცირების შეთანხმების გაფორმება, ვიზალიბერალიზაცია, ევროკავშირში გაწევრიანების კანდიდატის სტატუსის მიღება.
დარწმუნებული ვარ, რომ ჩვენი ქვეყანა – ქართველი ხალხი, ხელისუფლება გააგრძელებს პროგრესს ამ გზაზე და ერთად მივაღწევთ საბოლოო მიზანს – ევროკავშირში გაწევრიანებას!
ასევე, მიუხედავად იმისა, ხარ თუ არა დღევანდელი ხელისუფლების მხარდამჭერი, ერთი ძალიან მნიშვნელოვანი ფაქტი ყველასთვის ნათელი უნდა იყოს – 2012 წელს საქართველოში ხელისუფლების ცვლილების შემდეგ ბიზნესისადმი მიდგომა რადიკალურად შეიცვალა, ჩამოყალიბდა ბიზნესის კეთებისთვის თავისუფალი და უსაფრთხო გარემო, მეწარმეებს შესაძლებლობა აქვთ, გაზარდონ საკუთარი ბიზნესი და შექმნან ახალი სამუშო ადგილები. შედეგად, მივიღეთ სტაბილური და, რაც მთავარია, სწრაფი ტემპით მზარდი ეკონომიკა, რაც თითოეული მოქალაქის კეთილდღეობაზე აისახება.
რაც შეეხება დღევანდელი აჟიოტაჟის თემას, გამჭვირვალეობის კანონს, თითოეული ჩვენგანისთვის ცნობილია, რომ ევროპის ერთ-ერთი მთავარი ღირებულება სწორედ გამჭვირვალეობა და კარგი მმართველობაა (Good Governance). ეს არის ძალიან მნიშვნელოვანი როგორც საჯარო, ისე კერძო სექტორისთვის. შეიძლება ითქვას, რომ დღეს საქართველოში ბიზნესი გამჭვირვალეა, მათ შორის, საგადასახადო და ინვესტიციების წარმომავლობის კუთხით. ჩემი ღრმა რწმენით, ასევე მნიშვნელოვანია გამჭვირვალეობა ნებისმიერ სხვა სექტორში, მათ შორის, არასამთავრობო სექტორში.
კარგად მოგეხსენებათ, რომ სწორედ ადგილობრივი რამდენიმე არასამთავრობო ორგანიზაციის უცხოური (დიდი ალბათობით, ჩრდილოეთიდან) გაუმჭვირვალე დაფინანსებით მოხდა ხელოვნური აქციების გამართვა და არაერთი სტრატეგიული პროექტის განხორციელების შეფერხება (მათ შორის, ნამახვანის ჰესი), რამაც უდიდესი ზიანი მიაყენა ჩვენს ქვეყანას და ქართველ ხალხს.
ბოლოს მინდა, აღვნიშნო, რომ ჩვენი ვალია, არ მივცეთ ქვეყნის არაკეთილმოსურნეებს სიტუაციის არევის საშუალება და მშვიდობა და განვითარება შევინარჩუნოთ! დარწმუნებული ვარ, ბრძენი ქართველი ხალხი კიდევ ერთხელ იტყვის საკუთარ სიტყვას სიმშვიდის შენარჩუნების, საქართველოს განვითარების და ევროინტეგრაციის საქმეში!“ – აცხადებს ილია წულაია.
მსგავსი სტატიები:
“ყველა პარტიასთან არსებობს რაღაც ტიპის საუბრები“-მდინარაძე
ირაკლი კობახიძე ადამ კიზინგერის ხისტ განცხადებას მოისმენს – თავისუფლება პოლიტპატიმრებს, დანიშნეთ ვადამდელი არჩევნები
ამ კაცმა თავის ყველა მეზობელს სიმყუდროვე და კომფორტი შეუქმნა – თემურ თათარაშვილი
დედის შემდეგ, კორონავირუსით ინფიცირებული ტყუპებიც გარდაიცვალნენ
დავით კირკიტაძემ სასამართლო პროცესი პროტესტის ნიშნად დატოვა
“ერეკლე არ არის ქართველების საუკეთესო მეფეთა არც სამეულში, არც ხუთეულში…ათეულშიც არაა” – ბერძენიშვილი
მოვუწოდებთ საქართველოს მთავრობას, იმუშაოს დასავლელ პარტნიორებთან, რათა შეაჩეროს რუსეთის მავნე გავლენა – ჰელსინკის კომისია
საქართველოში მთავარი იმპორტიორი თურქეთი პომიდვრის გაყიდვას კრძალავს – კიდევ სად ვყიდულობთ პროდუქტს