რით ვაჭრობს საქართველო ამერიკასთან, რომელმაც ქვეყანას 10%-იანი საბაზისო ტარიფები დაუწესა

აღსანიშნავია ისიც, რომ ტრამპის მიერ გამოცხადებული ტარიფების ფარგლებში საქართველოს, სომხეთისა და აზერბაიჯანის მიმართ საბაზისო 10%-იანი ტარიფი იმოქმედებს. რაც შეეხება ვადებს. საბაზისო 10%-იანი ტარიფები 5 აპრილს შევა ძალაში.

ტრამპის გადაწყვეტილებას უკვე ეხმაურებიან მსოფლიო ლიდერები და ამერიკის წინააღმდეგ საპასუხო ტარიფების დაწესებას აანონსებენ.

რით ვაჭრობს საქართველო ამერიკასთან

„ბიზნესპრესნიუსი“ გთავაზობთ, როგორია აშშ-საქართველოს შორის ვაჭრობა:

მიმდინარე წელს ამერიკა საქართველოს ნომერ პირველი სავაჭრო პარტნიორია. კერძოდ, 2025 წლის იანვარ-თებერვალში ორ ქვეყანას შორის სავაჭრო ბრუნვამ 486 859 570 დოლარი შეადგინა. საქართველოს აშშ-სთან დეფიციტური ვაჭრობა აქვს, რაც იმას ნიშნავს, რომ გაცილებით მეტს ვყიდულობთ, ვიდრე ვყიდით.

ასე მაგალითად, საანგარიშო პერიოდში ამერიკიდან საქართველოში იმპორტირებულია 478 259 970 დოლარის პროდუქცია. საქართველოდან კი ექსპორტზე გავიდა 8 599 600 დოლარის საქონელი (რეექსპორტის ჩათვლით), საიდანაც 8 322 070 დოლარი ქართული პროდუქციის ექსპორტზე მოდიოდა.

წელს პირველ ორ თვეში ყველაზე მეტი ღირებულების შემდეგი 5 ქართული პროდუქცია გავიდა ექსპორტზე:

• შავი ლითონის მილები, მილაკები და ღრუ პროფილები – 2.13 მლნ დოლარის 1 997 ტონა;
• საფრენი აპარატების ნაწილები – 1.65 მლნ დოლარის 5.68 ტონა;
• ყურძნის ნატურალური ღვინოები – 1.36 მლნ დოლარის 193.8 ტონა;
• ხილისა და ბოსტნეულის წვენები – 709 ათასი დოლარის 530 ტონა;
• მინერალური და მტკნარი წყლები – 347 ათასი დოლარის 568 ტონა.

რაც შეეხება იმპორტს, საანგარიშო პერიოდში აშშ-დან შემდეგი პროდუქტები შემოვიდა:

• სურათები, ნახატები და პასტელები – 227 958 470 დოლარის 5.24 ტონა;
• მსუბუქი ავტომობილები – 193 495 530 დოლარის 15 301 ერთეული;
• ქანდაკებების და სტატუეტები – 30 663 540 დოლარის 19 ტონა;
• თხილი და სხვა კაკალი – 4 699 100 დოლარის 652 ტონა;
• სატვირთო ავტომობილები – 1 821 480 დოლარის 70 ერთეული.

„ბიზნესპრესნიუსი“ აგრძელებს თემაზე მუშაობს და შეფასებებს ეტაპობრივად შემოგთავაზებთ.