ევრაზიის ეკონომიკური კავშირის ქვეყნები (რუსეთი, სომხეთი, ბელარუსი, ყაზახეთი, ყირგიზეთი) მარცვლეულის, მზესუმზირის ზეთისა და შაქრის ექსპორტის ერთიანი კვოტის შემოღებას გეგმავენ, რისი მიზანიც სასურსათო უსაფრთხოების გარანტიის უზრუნველყოფა და საქონლის ფასების ნაწილობრივი სტაბილიზაციაა. ინფორმაცია აგრარული ბაზრის კონიუნქტურის ინსტიტუტის (ИКАР) ვებგვერდზე ვრცელდება.
შეზღუდვების პროექტი ევრაზიის კავშირის კოლეგიამ შეადგინა, რისი განხილვაც 18 აპრილს უნდა დასრულდეს. პროექტი ხორბალსა და მესლინაზე (ხორბლისა და ჭვავის ნარევზე), ქერზე, სიმინდზე, მზესუმზირის ზეთსა და მის ფრაქციებზე საექსპორტო კვოტების შემოღებას ითვალისწინებს. კვოტები დაწესდება თეთრი შაქრისა და ნედლი შაქრის ექსპორტზეც.
„ამ საქონელს აქვს პრიორიტეტული მნიშვნელობა კავშირის წევრი ქვეყნების სასურსათო უსაფრთხოების უზრუნველსაყოფად და მნიშვნელოვან როლს ასრულებს კავშირის ბაზარზე ფასების სტაბილიზაციისთვის,“ – ნათქვამია პროექტის განმარტებით ბარათში.
bpn.ge
ქვეყნებმა ევრაზიის ეკონომიკურ კომისიას ამ საქონლის წლიური წარმოებისა და მოხმარების შესახებ თავიანთი გამოთვლები უნდა წარუდგინონ, რის შემდეგაც კვოტა ქვეყნებს შორის გადანაწილდება. ექვსი თვის განმავლობაში ერთიანი საექსპორტო კვოტის შემოღება იგეგმება.
რუსეთში ყველა ამ საქონლის ექსპორტზე შეზღუდვები უკვე მოქმედებს. მაგალითად, მარცვლეულის ექსპორტი ევრაზიის ეკონომიკური კავშირის წევრ ქვეყნებში 30 ივნისამდე აკრძალულია. ძირითადი მიზეზი ის არის, რომ ადრე გაერთიანების ზოგიერთი ქვეყნის მეშვეობით რუსული პროდუქციის ექსპორტი გადასახადების გვერდის ავლით ხდებოდა.
თავის მხრივ, ყაზახეთი, რომელიც ქართველი იმპორტიორებისთვის რუსეთის შემდეგ მეორე ბაზარია, მარცვლეულისა და ფქვილის ექსპორტზე დროებით შეზღუდვებს აწესებს. ამის შესახებ ქვეყნის სოფლის მეურნეობის მინისტრ იერბოლ კარაშუკევმა განაცხადა, რასაც „ვედომოსტი“ ავრცელებს. მისი თქმით, შეზღუდვა ორ კვირაში დაწესდება და 15 ივნისამდე იქნება ძალაში.
მინისტრმა დააზუსტა, რომ ამ პერიოდში ექსპორტიორები ყაზახეთიდან მილიონი ტონა მარცვლეულის ექსპორტს შეძლებენ, თუმცა ამ მოცულობის 10% შიდა ბაზარს დაბალ ფასებში უნდა მიაწოდონ. მთავრობა იგივე შეზღუდვის შემოღებას ფქვილის წისქვილებთან მიმართებაშიც აპირებს: ისინი 15 ივნისამდე 300 000 ტონა ფქვილის ექსპორტს შეძელებენ, რომლის 10% შიდა ბაზარზე უნდა გაიტანონ.
კარაშუკევი ამბობს, ეს კვოტები ფქვილისა და მარცვლეულის ექსპორტიორების უფლებებს არ ზღუდავს, რადგან საექსპორტო ფქვილის მიწოდებამ, ბოლო ხუთი წლის განმავლობაში, თვეში, საშუალოდ, 100-120 ათას ტონა, მარცვლეულის კი 300 ათასი ტონა შეადგინა.
ამასთან, ყაზახეთის მთავრობა, წინა წელთან შედარებით, 20%-ით მზესუმზირის ზეთის ექსპორტსაც ამცირებს.
bpn.ge
მსგავსი სტატიები:
საქართველოში კორონავირუსის რეკორდულად მაღალი – 1192 ახალი შემთხვევა დადასტურდა
მსახიობი კრისტოფერ პლამერი გარდაიცვალა
“როგორც ღირსება, ასევე, ქართველობა – არ არის ბიოლოგიური კომპონენტი”
ქართველი „კანონიერი ქურდი“ საბერძნეთის ციხეში გარდაცვლილი იპოვეს
Pfizer-ით აცრა საქართველოში 16 ივლისიდან დაიწყება
ჯონსონ & ჯონსონის ვაქცინის მოწოდება შეჩერდა, ვერ შევთანხმდით – გამყრელიძე
როგორი ამინდია მოსალოდნელი საქართველოში?
ფოთში დააკავეს დედა, რომელმაც ახალშობილი საკანალიზაციო მილში დატოვა