” რას ეუბნებით თქვენს ამომრჩეველს, რომელიც ახლა ამას კითხულობს”?!-ექსპერტები ოპოზიციას

“ოპოზიციამ ცუდად იმუშავა ბევრი მიმართულებით”-აცხადებს ექსპერტი არჩილ გამზარდია, რომელიც ევროსაბჭოს საპარლამენტო ასამბლეის მიერ გამოქვეყნებულ ანგარიშს ეხმაურება, სადაც საქართველოზეცაა საუბარი:

“ოპოზიციამ ცუდად იმუშავა ბევრი მიმართულებით. ვერც აქ დაიცვა ხმები, ვერც პარტნიორებთან”-წერს გამზარდია. სიმართლე. მე მგონი, უკვე დროში და სივრცეშიც არ ფლობს სიტუაციას და უეფექტო სატელევიზიო ცხოვრებას, ჯობს, დასხდნენ და ჩამოყალიბდნენ რაიმე არსებითზე, თან რეალურზე, სხვა შემთხვევაში ოპოზიცია ვერ აცდება პოლიტიკურ გაბანკროტებას.

აღნიშნულ განცხადებას ასევე საკუთარ ფეისბუკ გვერდზე გამოეხმაურა ექსპერტი ხათუნა ლაგაზიძე  და ოპოზიციის მისამართით რამდენიმე კითხვას სვამს: “ძალიან დიდი ბოდიში მომითხოვია, მაგრამ, ხმები ვერ დაიცავით, საერთაშორისო ორგანიზაციებთან და სტრატეგიულ პარტნიორებთან ვერ იმუშავეთ, აბა ამომრჩევლის ვალი რაც იყო, პირნათლად მოიხადა – მოვიდა და მოგცათ ხმა საარჩევნო უბნებზე. და ეხლა მაინც მიხვდით რომ რადიკალურად გადაასაზრებელი გაქვთ მოქმედების ფორმებიც და შინაარსიც როგორც ქვეყნის შიგნით, ასევე – გარეთ! რას ეუბნებით თქვენს ამომრჩეველს, რომელიც ახლა ამას კითხულობს”?!- აღნიშნავს ლაგაზიძე.

ცნობისთვის: ასამბლეის 2020 წლის მონიტორინგის ანგარიშში, რომელიც ასამბლეის ვებგვერდზე გამოქვეყნდა, ევროსაბჭოს საპარლამენტო ასამბლეა საქართველოს მოუწოდებს, „სრულად და გამჭვირვალედ გამოიძიოს 2020 წლის ოქტომბრის საპარლამენტო არჩევნებისას ყველა საარჩევნო გადაცდომაზე ბრალდებები. ასამბლეა ასევე მოუწოდებს „ყველა პოლიტიკურ პარტიას, დაიკაონ მათ მიერ ახალ პარლამენტში მოპოვებული ადგილები და ძირი არ გამოუთხარონ მის დემოკრატიულ ფუნქციონირებას“. აქვე აღნიშნულია, რომ მიუხედავად საარჩევნო სისტემის თაობაზე მიღწეული შეთანხმებისა, საქართველოში პოლიტიკური კლიმატი კვლავ პოლარიზებული და სადავო რჩება. ანგარიშში ნახსენებია, რომ საქართველოში საპარლამენტო არჩევნებს აკვირდებოდნენ საერთაშორისო და ადგილობრივი დამკვირვებლები, რომელთაც ერთხმად დაასკვნეს, რომ არჩევნები იყო კონკურენტული, ის ჩატარდა ფუნდამენტური თავისუფლებების დაცვით და პარტიებს შესაძლებლობა ჰქონდათ კამპანია თავისუფლად ეწარმოებინათ. აქვე საუბარია, რომ დამკვირვებლებმა მიუთითეს არათანაბარ გარემოზე, ადმინისტრაციული რესურსების ბოროტად გამოყენებაზე, კამპანიის დაფინანსების და გამჭვირვალობის სუსტ რეგულაციებზე, რამაც აშკარა ფინანსური უპირატესობა მისცა გარკვეულ პარტიებს, მათ შორის მმართველ პარტიას. დამკვირვებლებმა ასევე მიუთითეს ზოგიერთ საარჩევნო უბანზე ოქმებში შეუსაბამობებზე.
გააზიარეთ და მოიწონეთ სტატია: