ალასანია, გახარია, კობახიძე – ირაკლი ჩიქოვანის გზა თავდაცვის მინისტრობამდე

საქართველოს პრემიერ-მინისტრის, ირაკლი ღარიბაშვილის გადადგომის შემდეგ, პრემიერ-მინისტრობის კანდიდატმა ირაკლი კობახიძემ 2 თებერვალს პარლამენტში წარადგინა მთავრობის შემადგენლობა და სამთავრობო პროგრამა – „ევროპული სახელმწიფოს მშენებლობისთვის“.

მინისტრთა კაბინეტში მხოლოდ ერთი, თავდაცვის მინისტრი იცვლება. მინისტრი ჯუანშერ ბურჭულაძე კი რამდენიმე თვეში NATO-სთან საქართველოს წარმომადგენლობის ხელმძღვანელის თანამდებობას დაიკავებს. თავდაცვის მინისტრობის კანდიდატი პარლამენტის ვიცე-სპიკერი ირაკლი ჩიქოვანია.

ის ამჟამად ევროპის საბჭოს საპარლამენტო ასამბლეაში (PACE) საქართველოს საპარლამენტო დელეგაციასაც ხელმძღვანელობს და არის NATO-ს საპარლამენტო ასამბლეაში დელეგაციის წევრი.

„სხვა საკითხია, რამდენად ეყოფა მას [კობახიძის მინისტრთა კაბინეტში] გამბედაობა გადაწყვეტილებების მიღების დროს, რიტორიკაში, მაგრამ ერთ რამეში აბსოლუტურად დარწმუნებული ვარ: თუ ის გახდა თავდაცვის მინისტრი, მშვიდად შეგვიძლია ვიყოთ ორი თვალსაზრისით: ერთი, ფულს არ მოიპარავს თავდაცვისგან და ჯარისგან; მეორე, ის არ დახლართავს ინტრიგებს ამერიკელების, NATO-ს და ჩვენი დასავლელი პარტნიორების წინააღმდეგ. “, – თქვა თავდაცვის ყოფილმა მინისტრმა თინა ხიდაშელმა მომავალ მინისტრზე.

პარლამენტის თავდაცვისა და უშიშროების კომიტეტის თავმჯდომარის მოადგილეს (ოპოზიციიდან) თეონა აქუბარდიას იმედი აქვს, რომ ირაკლი ჩიქოვანი, მისი წინამორბედისგან განსხვავებით უპასუხოდ არ დატოვებს პარლამენტარების შეკითხვებს.

„რუსეთის აგრესიისგან გამომდინარე დიდი გამოწვევის წინაშე დგას საქართველო, არც თავდაცვის ბიუჯეტის ზრდა და არც რაიმე ტიპის დიდი შეიარაღების შესყიდვაზე საუბარი არ არის. შორს ვარ იმ აზრისგან, რომ კობახიძეა ის პირი, ვისაც თავის ქვეყნის ჯარი და ტერიტორიული მთლიანობა დიდად აღელვებდეს, რადგან არასდროს არც საოკუპაციო ხაზზე ყოფილა და სამხედრო აღლუმის დროსაც კი არ იმყოფებოდა. დიდად გამიხარდება, თუ ირაკლი ჩიქოვანი წარმატებული მინისტრი იქნება“, – დაამატა თეონა აქუბარდიამ.

კარიერული გზა თავდაცვის მინისტრობამდე

ირაკლი ჩიქოვანის საჯარო პოლიტიკაში გამოჩენა თავდაცვის ყოფილ მინისტრს ირაკლი ალასანიას უკავშირდება. სანამ ჩიქოვანს „თავისუფალი დემოკრატების“ გენერალური მდივნის პოზიციიდან გაიცნობდა საზოგადოება, ის 2009 წლამდე გაეროსთან საქართველოს მუდმივი წარმომადგენლის, ირაკლი ალასანიას მოადგილე იყო.

2012 წლის საპარლამენტო არჩევნების შემდეგ, ის „ქართული ოცნების“ უმრავლესობაში შემავალი „თავისუფალი დემოკრატების” ფრაქციის თავმჯდომარე გახდა.

ჩიქოვანი 2014 წელს ოპოზიციაში ირაკლი ალასანიასთან ერთად წავიდა, რასაც წინ უძღოდა, ერთობლივ ბრიფინგზე თავდაცვის იმდროინდელი მინისტრის განცხადება „საქართველოს ევროატლანტიკურ არჩევანზე შეტევის“ შესახებ.

ოპოზიციონერი ჩიქოვანი აქტიურად ჩაერთო საარჩევნო კამპანიაში და 2016 წლის საპარლამენტო არჩევნებში, ქალაქ ზუგდიდის ოლქში იყარა კენჭი, როგორც „თავისუფალი დემოკრატების“ მაჟორიტარი დეპუტატობის კანდიდატმა. ის აკრიტიკებდა ხელისუფლების მოქმედებას და მას არჩევნების გაყალბებაშიც ადანაშაულებდა.

„პირდაპირ შემიძლია ვთქვა, რომ „ქართული ოცნება“ დღეს იწყებს არჩევნების და არჩევანის მოპარვას ზუგდიდელებისთვის“, – აცხადებდა ჩიქოვანი 2016 წლის აგვისტოში.

იმავე პერიოდში ის დეტალურად ხსნიდა არჩევნების გაყალბების სქემებს: „ქართული ოცნების“ კოორდინატორები პრობაციონერების ოჯახებს ამნისტიას ჰპირდებიან და სანაცვლოდ არჩევნებზე მხარდაჭერას სთხოვენ. ანალოგიური პროცესი მიმდინარეობს შინაგან საქმეთა სამინისტროს მხრიდან მართვის უფლების აღდგენის შესახებ აკრძალვის ქვეშ მყოფი მძღოლების მიმართ“.

საბოლოოდ, ჩიქოვანმა მაჟორიტარულ ოლქში 15.2% აიღო, პარტიამ კი 5%-იანი ბარიერი ვერ გადალახა. პარლამენტს გარეთ დარჩენილმა ჩიქოვანმა დაახლოებით ორ თვეში ოპოზიციური პარტია დატოვა, რასაც წინ უძღოდა პოლიტიკიდან ირაკლი ალასანიას წასვლის გადაწყვეტილება.

მორიგი ლიდერი – გიორგი გახარია~