აშშ რწმუნდება, რომ არჩევნები არ შეესაბამებოდა საერთაშორისო სტანდარტებს- გორდაძე

პარიზის პოლიტიკურ მეცნიერებათა ინსტიტუტის პროფესორი თორნიკე გორდაძე ფორმულასთან სტუმრობისას ოპოზიციური პარტიების შესაძლო სტრატეგიას განიხილავს და ამბობს, რომ ოპოზიციამ აუცილებელია დასავლეთს აჩვენოს, რომ არჩევნების გაყალბების მასშტაბი იყო დიდი და რომ ის არ აპირებს ხელისუფლების უკანონო გზით ხელში ჩაგდებას.

“მთავარი აქ არის ის, რომ ოპოზიციამ დაარწმუნოს დასავლეთი ორ რამეში და მე თავიდანვე ვთქვი, რომ ეს იქნებოდა რთული და ხანგრძლივი პროცესი. ერთი, რომ გაყალბების მასშტაბი იყო ძალიან დიდი და ამაში დასავლეთი ნელ-ნელა რწმუნდება, ჩვენ ეს დავინახეთ და მეორე, რომ ოპოზიცია არის პასუხისმგებლიანი ძალა და რომ ამ ხალხს არ აქვს მიზანდასახული უკანონო, თუ ძალისმიერი მეთოდებით ხელისუფლების ჩაგდება ხელში. რომ ეს არის დისციპლინირებული, ცივილიზებული ოპოზიცია, რომელიც აპირებს ხანგრძლივი მშვიდობიანი პროტესტით მიაღწიოს მის მთავარ მიზანს, რაც არის არჩევნების შედეგების გაუქმება და ხელახალი არჩევნების ჩატარება”, – ამბობს გორდაძე.

მისი შეფასებით, მთავარი სახელმწიფო დეპარტამენტის წარმომადგენელთა განცხადებებში იყო ის, რომ არჩევნების გაყალბების მასშტაბი ადეკვატურად არის შეფასებული. თავისთავად ის ფაქტი, რომ სახელმწიფო დეპარტამენტმა ოპოზიციას პარლამენტში შესვლისაკენ მოუწოდა, გორდაძის შეფასებით, გასაკვირი არც უნდა იყოს.

“როგორც ჩანს, ყინული დაიძრა და დასავლეთი, კერძოდ აშშ, რწმუნდება იმაში, რომ ეს არჩევნები მართლაც არ შეესაბამებოდა საერთაშორისო სტანდარტებს. არ არის გასაკვირი, რომ აშშ მოუწოდებს ოპოზიციას შევიდეს პარლამენტში, ეს ყოველთვის ასე ხდებოდა. მათივე განცხადებებში, საკმაოდ არაორაზროვნად აღნიშნეს, რომ იყო ძალიან სერიოზული დარღვევები. ფატალურ ზიანზე არის ლაპარაკი, არჩევნების შედეგების კუთხით. ეს ყველანაირ საფუძველს გიქმნის, რომ ამ არჩევნების ლეგიტიმურობა დააყენო კითხვის ნიშნის ქვეშ”, – ამბობს გორდაძე.

მისი შეფასებით, ოპოზიციას წარსული გამოცდილებების მსგავსად მარგინალიზაციის საფრთხე არ უდგას. ერთადერთი საფრთხე, მისი თქმით, კოვიდპანდემიის შედეგად შეკრებებზე გამოსვლის შიშია, რომელიც გრძელვადიანად ისევ ხელისუფლებას დააზარალებს.

“საშიშროება არის, რომ სიტუაცია დამძიმდეს ქვეყანაში. ჩვენ ყოველდღიურად ვადევნებთ თვალს ეპიდემიის სტატისტიკას და ის უარესდება დღითი დღე. ხალხს ეშინია აქციებზე გამოსვლის და ა.შ. ამან შეიძლება ითამაშოს უარყოფითი როლი, მაგრამ არ მგონია, რომ ხელისუფლების მიმართ დამოკიდებულება უკეთესობისკენ შეიცვალოს. პირიქით, ეკონომიკური კრიზისით უფრო დამძიმდება და ზამთარში და შემოდგომაზე სიტუაცია ბევრად უფრო უარესი იქნება ყველასთვის”, – ამბობს გორდაძე.

მისი თქმით, აუცილებელია გაგრძელდეს ხელისუფლებასა და ოპოზიციას შორის მოლაპარაკებები და გამოინახოს კომპრომისული შეთავაზება, რათა ხელისუფლებამ სახე შეინარჩუნოს და ამომრჩეველს საარჩევნო პროცესის მიმართ ნდობა გაუჩნდეს.

“მე ვფიქრობ, რომ ხანგრძლივ მოლაპარაკებების პროცესში შესვლა აუცილებელია, აუცილებელია კონსტრუქციული შეთავაზებების გაკეთება, რომელიც მათ შეუნარჩუნებდა სახესაც. შეიძლება შესთავაზონ, რომ მეორე ტურები გაზაფხულზე გადაიტანონ და მოხდეს საარჩევნო სტრუქტურის და ცესკო-ს რეფორმირება და ამ პერიოდში მოხდეს იმ საჩივრების განხილვა და გადათვლა”, – ამბობს გორდაძე.

ოპოზიცია ამ დრომდე ბოიკოტის რეჟიმში რჩება. მათი შეფასებით, 2020 წლის 31 ოქტომბერს ჩატარებული არჩევნები გაყალბდა და ის არ ასახავს ქართველი ამომრჩევლის ნებას. ბოიკოტს 8-ვე ოპოზიციური პარტია შეუერთდა, რომელმაც საარჩევნო 1%-იანი ბარიერი გადალახა და არჩევნების გზით მანდატი მოიპოვა. ისინი ბოიკოტს უცხადებენ არჩევნების მეორე ტურებსაც, რომელიც ქვეყნის მასშტაბით 16 მაჟორიტარულ ოლქში 21 ნოემბერს გაიმართება.

პირველი ტურების შემდეგ ოპოზიციის წარმომადგენლების მიერ შედგენილი საჩივრებიდან ცესკო-მ შემაჯამებელ სხდომაზე არცერთი დააკმაყოფილა.

ასევე არჩევნებზე დამკვირვებელი ავტორიტეტული არასამთავრობო ორგანიზაციების საჩივრებიდან ცესკო-მ მხოლოდ 17% დააკმაყოფილა.

ოპოზიციასა და ხელისუფლებას შორის მოლაპარაკებები კი ამერიკის ელჩის რეზიდენციაში, ევროკავშირისა და აშშ-ის ელჩების მონაწილეობით მიმდინარეობს. აქამდე გამართული ორი შეხვედრის შემდეგ ოპოზიციის ლიდერები მტკიცედ აცხადებენ, რომ მათი პრინციპული მოთხოვნა ხელახალი არჩევნების ჩატარებაა.

გააზიარეთ და მოიწონეთ სტატია:

მსგავსი სტატიები

  • 93
    TI: ხელისუფლება ივანიშვილის გავლენის ქვეშაასაერთაშორისო გამჭვირვალობა-საქართველო აქვეყნებს მოკვლევას არაფორმალური მმათველობის პრობლემასა და მისი შედეგების შესახებ. ორგანიზაციის შეფასებით, "ქართული ოცნების მმართველობის ორი ვადის გასვლის თავზე დაგროვილი მტკიცებულებები საკმარისია იმის სათქმელად, რომ კორუფციამ საქართველოში სახელმწიფოს მიტაცების ფორმა მიიღო დღეის მდგომარეობით, საქართველოს ხელისუფლების აღმასრულებელი შტო მთლიანად ერთი ადამიანის გავლენის ქვეშაა. აღმასრულებელ ხელისუფლებას გამოცლილი აქვს შეკავებისა და გაწონასწორების დემოკრატიული მექანიზმები, რაც განპირობებულია…
    Tags: და, არ, რომ
  • 92
    პოლიტიკოსებმა კომენტარები გააკეთეს აშშ-ის ელჩის რეზიდენციაში შეხვედრის შემდეგამერიკის ელჩის რეზიდენციაში "ქართულ ოცნებასა" და იმ ოპოზიციური პარტიების ლიდერებს შორის, რომლებმაც 31 ოქტომბრის არჩევნებში ზღვარი გადალახეს და პარლამენტში შესვლისთვის საჭირო ხმები მოიპოვეს, მეორე შეხვედრა გაიმართა. შეხვედრას ამერიკის ელჩთან ერთად ესწრებოდა ევროკავშირის ელჩიც. შეხვედრიდან გამოსული პოლიტიკოსების განცხადებები კონკრეტულ დეტალებს არ მოიცავდა, თუმცა დიალოგის გაგრძელების პერსპექტივების შესახებ წარმოდგენას ქმნის. „კონკრეტული რაიმე…
    Tags: და, რომ, არის, არ
  • 90
    "მე საკუთარი თავი შევიყვარე"- ძალადობის მსხვერპლი ახალგაზრდა ქალის შეცვლილი ცხოვრება 30 წლის დიანა ხერემიანი თბილისიდანაა. ახლა ქალაქ ოზურგეთში ცხოვრობს. ხუთი წლის წინ მოძალადე ქმარს დედაქალაქიდან დააღწია თავი და ცხრა წლიანი, ოჯახური ცხოვრება ერთ დღეში დაასრულა...მანამდე იყო  თანაცხოვრების ურთულესი წლები, მორალური, ფსიქოლოგიური და ფიზიკური ძალადობა, დაუსრულებლად გრძელდებოდა... დედამ უარყო, მეგობრებმა მიატოვეს, სამყარომ ზურგი აქცია და სიფრიფანა გოგო, დარჩა მოძალადე ქმრის პირისპირ.…
    Tags: და, არ, რომ
  • 90
    „გურული დონკიხოტი „- ვინ არის აქტივისტი ქალი, რომელიც რეგიონის ბუნებას ხმალამოღებული იცავსირმა გორდელაძე ოზურგეთის მუნიციპალიტეტში, სოფელ ლიხაურში ცხოვრობს. ისტორიის და სამოქალაქო განათლების პედაგოგია. ყოველთვის აქტიური იყო და საკუთარი სოფლის ყველა საჭირბოროტო საკითხის მოგვარებაში იღებდა მონაწილეობას. ბუნებისდამცველი აქტივისტი მას შემდეგ გახდა, რაც მის სოფელში, მდინარე აჭის ხეობაში, ინერტული მასალის მოსაპოვებლად ერთ-ერთი კომპანია შევიდა და მდინარის კალაპოტს ტრაქტორები მიადგნენ. ირმა იყო ყველგან, დაიწყო…
    Tags: და, რომ, არ