საქართველოს პრეზიდენტი, სალომე ზურაბიშვილი სახელმწიფო ინსპექტორის სამსახურის გაუქმებასთან დაკავშირებით “ქართული ოცნების” კანონპროექტს ეხმაურება და წერს, რომ “მიუღებელია დამოუკიდებელი სახელმწიფო ინსტიტუტის, სახელმწიფო ინსპექტორის სამსახურის გაუქმების შესახებ გადაწყვეტილების წინასწარი კონსულტაციების გარეშე ინიცირება და დაჩქარებული წესით განხილვა”.
სალომე ზურაბიშვილი პარლამენტს მოუწოდებს, შეწყდეს საკითხის დაჩქარებული წესით განხილვა.
“ჩემთვის, როგორც ქალი პრეზიდენტისთვის, ასევე მიუღებელია სახელმწიფო ინსპექტორის სამსახურის ქალი ხელმძღვანელის, ლონდა თოლორაიას მიმართ მსგავსი მოპყრობა.
სახელმწიფოში, სადაც გამოცხადებული პრიორიტეტების მიხედვით უნდა ხდებოდეს ქალების როლის გაძლიერება, ქალ ხელმძღვანელს დეკრეტულ შვებულებაში ყოფნისას, წინასაახალწლო პერიოდში, ყოველგვარი გაფრთხილების გარეშე უუქმებენ უწყებას.
მიუღებელია, უწყების ხელმძღვანელმა საკუთარი სამსახურის გაუქმებასთან დაკავშირებით ინფორმაცია მედიიდან შეიტყოს. ამასთან, აღსანიშნავია, რომ ინიცირებული ცვლილების განხორციელება გამოიწვევს არა მხოლოდ დამოუკიდებელი სახელმწიფო ინსტიტუტის ქალი ხელმძღვანელის, არამედ 100 -ზე მეტი ადამიანის სამსახურის გარეშე დატოვებას. მიმაჩნია, რომ არ არსებობს ამ ცვლილების დაჩქარებული წესით განხორციელების აუცილებლობა.
მაშინ, როდესაც ქვეყანა იმყოფება ასეთი მძიმე პოლარიზაციის პირობებში, ყველა მსგავსი გადაწყვეტილების მიღება საზოგადოებაში იწვევს ბუნდოვანებას და კითხვებს, რაც რეალურად დამაზიანებელია დეპოლარიზაციის პროცესისათვის!
მნიშვნელოვანია შექმნილი ვითარებიდან გამოსავლის პოვნა, რისთვისაც გთავაზობთ:
შეწყდეს ამ საკითხის დაჩქარებული წესით განხილვა და ყველას მიეცეს შესაძლებლობა წარადგინოს საკუთარი არგუმენტები, ინსპექტორს კი, მიეცეს საშუალება პარლამენტს გააცნოს უკვე წარდგენილი ანგარიში საკუთარი საქმიანობის შესახებ და შემდეგ, ყოველივე ამის საფუძველზე, მიღებულ იქნას დასაბუთებული გადაწყვეტილება, რომელიც საზოგადოებაში მოხსნის კითხვებს!
ასევე, ყველაფერი უნდა გაკეთდეს ამ უწყებაში დასაქმებული 114 -ვე თანამშრომლისთვის, მათ შორის სახელმწიფო ინსპექტორისათვის სამუშაო ადგილის შესანარჩუნებლად”,-ნათქვამია პრეზიდენტის განცხადებაში.
სახელმწიფო ინსპექტორის სამსახურის გაუქმებასთან დაკავშირებით მმართველი გუნდის ინიციატივაზე ინფორმაცია 2 დღის წინ გავრცელდა. ირკვევა, რომ “ოცნება” აპირებს, ამ უწყების ნაცვლად შექმნას ორი სამსახური – სპეციალური საგამოძიებო და პერსონალურ მონაცემთა დაცვის სამსახურები.
მსგავსი სტატიები:
რის სანაცვლოდ გაურიგდა “უცნობი” სააკაშვილს?
ზიმბაბვეს საგარეო საქმეთა მინისტრი კორონავირუსით გარდაიცვალა
“ბიძინა ივანიშვილმა საარჩევნო ოქმები „გააპრავა“,მელიას დაჭერა „გააპრავა“”
“გირჩის” 7 მოთხოვნა – რა შემთხვევაში შევლენ პარლამენტში?
გომელაური: შსს-მ ავტოპარკი განაახლა და უწყება კიდევ მეტი ავტომობილის შეძენას გეგმავს
ნიკა მელია ციხეს სავარაუდოდ, 13 მაისამდე დატოვებს
“ამ გირაოს გადახდით რა, პოლიტპატიმრად შეიძლება აღიარონ”? -ყაველაშვილი მელიაზე
სანაია: წულუკიანმა თქვა, გაგანადგურებთო – ვნახოთ როგორ გაგვანადგურებენ