“ამხელა ჰუმანიტარულ დახმარებას ვუგზავნით და სამარცხვინოა, როცა ამის არაფრად ჩაგდებას­ ცდილობენ!”

უკრაინაში დატრიალებული ტრაგიკული მოვლენების შესახებ “კვირის პალიტრასთან” რეჟისორი ნიკუშა შენგელაია საუბრობს:

“ძნელია იმის დაჯერება, რასაც ყოველდღე ვხედავთ და გვესმის. დღეს მარტო­ ერთი ქვეყანა კი არა, მთელი მსოფლიო დიდ განსაცდელშია. უკრაინა უპირისპირდება ერთ-ერთი უდიდესი არმიისა და შეიარაღების მქონე ქვეყანას, ეს არ არის მხოლოდ ერთი ქვეყნის განსაცდელი, ამიტომ მთელი მსოფლიო ცდილობს, ჩაერიოს. რუსეთს სანქციები თითქმის ყველა დიდმა ქვეყანამ დაუწესა, მე არ ვიცი, ეს სანქციები რა შედეგს გამოიღებს, მაგრამ ჯერჯერობით უკრაინაში ისევ განუკითხაობაა. ძალიან მეცოდება ეს ქვეყანა და უკრაინელი ხალხი, რადგან ჩვენ ერთ ბედქვეშა ვართ.

უკვე 14 წელი გავიდა ბუქარესტის­ სამიტის შემდეგ, სადაც თქვეს, რომ საქართველო ნატოს წევრი გახდებოდა, მაგრამ… მესმის, რომ სიტუაციის გამწვავება­ არ სურდათ, მაგრამ ყველაფერი გააკეთეს, რომ მსოფლიო ამ ზღვრამდე არ მის­ულიყო? იქნებ პროცესები უნდა დაჩქარებულიყო, იქნებ რუსეთისთვის მოძლიერების საშუალება არ უნდა მიეცათ? ბევრი უპასუხო კითხვა ჩნდება. მაინც, რით გამოიხატება “განსაკუთრებული პარტნიორობა”, რომელსაც საქართველოს სთავაზობენ? და თუ აგრესია ჩვენკენაც წამოვა, ნატო დაგვეხმარება? თუ ამ ქვეყნების წევ­რებად მიღებას მართლაც აპირებენ, მაშინ რაღაც დაცვის მექანიზმი ხომ უნდა არსებობდეს? ფაქტია, ჩვენი ქვეყნები განსაკუთრებული აგრესიის მსხვერპლია, რაც დასავლეთს წინასწარ უნდა გაეთვალა.

ახლა მთავარია, უკრაინაში სამხედრო მოქმედებები შეჩერდეს, რადგან იქ უდანაშაულო მოქალაქეები იღუპებიან, ქალაქები გადაწვეს და მიწასთან გაასწორეს! არც კი მჯერა, რომ ეს ყველაფერი ჩვენ თვალწინ დატრიალდა. უკრაინელებს უკან დასახევი გზა არა აქვთ და ბოლომდე იომებენ. მათ დახმარება სჭირდებათ და კიდეც ეხმარებიან, მაგრამ ყველა ქვეყანა ცდილობს, ომში არ ჩაერთოს. ყველა ცდილობს, თავისი ხალხი დაიცვას და ეს ბუნებრივიცაა, ამასობაში კი ნადგურდება ჩვენი მეგობარი სუვერენული ქვეყანა, იბომბება სკოლები, საავადმყოფოები, იღუპებიან ქალები, ბავშვები, მოხუცები… ამ ტრაგედიას ყველა განვიცდით! ღმერთმა ქნას, რომ ეს საშინელება მალე დასრულდეს!

ვფიქრობ, რომ დღეს ჩვენი ხელისუფლება მშვიდად და გონივრულად იქცევა.­ მთავარია, რომ მშვიდობა დღემდე შევინარჩუნეთ და ახლა მეტი ჭკუა და ერთიანობა გვმართებს. ჩვენ ეს ტრაგედია უკვე გამოვიარეთ და განვიცადეთ აფხაზეთსა და სამაჩაბლოში; რუსული ჯარები აქვე, ოციოდე კილომეტრში დგანან და ხელისუფლების სიფრთხილე ჩემთვის გასაგებია. ნებისმიერი ხელისუფლების უპირველესი მოვალეობა თავისი ხალხის უსაფრთხოების დაცვაა. ჩვენ არ უნდა მივცეთ საბაბი, თორემ მტერი რას გადაწყვეტს, წინასწარ არავინ იცის. დღეს ყველა საერთაშორისო ორგანიზაცია აღიარებს, რომ საქართველო გონივრულად მოქმედებს, რაც მისასალმებელია და ბევრ რამეს სცემს პასუხს.

ოპოზიციის ნარატივია, რომელიც სამარცხვინოდ იქცევა, ისინი საქართველოს იმიჯს აზიანებენ. ხომ არ შეიძლება, ყველაფრით პოლიტიკური დივიდენდების მოხვეჭა სცადო?! საქართველომ უკრაინას ყველა საგარეო ფორუმზე დაუჭირა მხარი,­ ყველა რეზოლუციას შევუერთდით, ჩვენს უკრაინელ მეგობრებს ამხელა ჰუმანიტარულ დახმარებას ვუგზავნით და სამარცხვინოა, როცა ამის არაფრად ჩაგდებას­ ცდილობენ! ნუთუ ვერ ხვდებიან, რომ ამით საკუთარ სამშობლოს მტრობენ? მით უმეტეს, რომ ყველაზე დიდი საფრთხე ჩვენ გვემუქრება! ძალიან მძიმე საყურებელია, როცა ასეთ ვითარებაში პოულობ დროს, რომ შენი ქვეყანა საერთაშორისო ასპარეზზე შეარცხვინო. ქართველი საზოგადოება ერთიანია, მაგრამ საქართველოში არის პოლიტიკური ძალა, რომელიც არაფრის წინაშე უკან არ დაიხევს და ქვეყნის მომავალს თავის ინტერესებს ამჯობინებს. ქართველი ხალხი ამას ყველაზე კარგად ხედავს.”- აცხადებს შენგელაია.

გააზიარეთ და მოიწონეთ სტატია:

მსგავსი სტატიები:

“ნიკა მელიას მოუწევს მასზე დაკისრებული გირაოს გადახდა”-კალაძე მაკო გომურის შემთხვევა გამონაკლისია, რომელსაც არ შეეხება ამნისტია- სარჯველაძე “სანამ ჩვენ დემოკრატიობანას ვთამაშობთ”… პოლიცია ფალავანდიშვილის, მორგოშიას და მახარაძის სახლებს ჩხრეკს ყოველთვის ეზიზღებოდა ნარკოტიკები. მგონი პლანიც არა აქვს მოწეული – დავით ზურაბიშვილი სააკაშვილზე “გადახაზეთ წითელი მარკერით და დააწერეთ – არა რუსეთს! გაეცით მომაკვდინებელი პასუხი მომავლიდან!” – ბაჩუკი ქარდავა “მოიხადოს სასჯელი და მერე ვილაპარაკოთ შერიგებაზე”-სუბარი “ძაან სწრაფად საუბრობ, ვერ გავიგე” – თალაკვაძე კითხვაზე, რატომ არავინ ჩავიდა საქართველოდან უკრაინაში?