დღეს დილით ქართველი მსახიობი და დიქტორი ჯულიეტა ვაშაყმაძე გარდაიცვალა. ის ქართული ტელევიზიის ერთ-ერთი პირველი სახე იყო. ჯულიეტა ვაშაყმაძემ ქართულ ტელეეკრანზე დასამახსოვრებელი სახე შექმნა, ცნობილია, რომ ის ყველა ტექსტს ზეპირად იმახსოვრებდა და ეთერში სწორედ ასე გადიოდა.
ის გამორჩეული იყო ასევე, საკუთარი გარეგნობით, ქართველი ჯაზ-ვუმენი 80 წლის გიული ჩოხელი ერთ-ერთ ინტერვიუში იხსენებს, რომ ჯულიეტა ვაშაყმაძე იყო ერთ-ერთი პირველი ქალი, რომელიც ქუჩაში მაკიაჟით დადიოდა, თავისი გამორჩეული სტილი ჰქონდა და მას თანატოლი გოგონები ბაძავდნენ.
ჯულიეტა ვაშაყმაძე გადაღებულია არაერთ ქართულ ფილმში, დასამახსოვრებელი როლები მან ფილმებში “არაჩვეულებრივი გამოფენა” და “ყვავილი თოვლზე” შექმნა.
“პრაიმამბებთან” ის მისმა კინოპარტნიორებმა იმედო კახიანმა და ლეო ანთაძემ გაიხსენეს.
იმედო კახიანი: ჯულიეტა საოცრად ნიჭიერი ადამიანი იყო. ორივემ თეატრალური ინსტიტუტი დავამთავრეთ, მაგრამ ჯულიეტა როცა მოვიდა მე აღარ ვიყავი იქ.
ურთიერთობაში თბილი ადამიანი იყო. მაშინ ელდარი “არაჩვეულებრივ გამოფენას” იღებდა, სადაც მეც მიღებდნენ ეპიზოდში და გადასაღებ მოედანზე ვხვდებოდით.
კარგ განწყობასთან არის ჩემთვის დაკავშირებული ჯულიეტა და ძალიან საწყენია, რომ ის აღარ არის.
ლეო ანთაძე: ჯულიეტა იყო ნიჭიერი, თავიდან არქიტექტურული დაამთავრა, შემდეგ დაიწყო სწავლა თეატრალურ ინსტიტუტში. რასაც ხელს ჰკიდებდა, ყველაფერი შესანიშნავად გამოსდიოდა.
ჩვენ ერთად დავდიოდით პიონერთა სასახლეში, ბავშვობიდან ვიცნობდით ერთმანეთს.
ჩემთვის არაჩვეულებრივი და გამორჩეული პარტნიორი იყო. ფილმში “ყვავილი თოვლზე” გვქონდა ერთი სცენა, სადაც მე ყვავილის მოსაწყვეტად მივდივარ და ამ დროს თოვლი წამოვა მთიდან და ამ თოვლში მოვყვებით. როცა ამოვძვრებოდით თოვლიდან, ორივეს უნდა გაგვეცინა.
მართლაც როცა თოვლიდან ამოვედით, თმები გაწეწილი ჰქონდა და გრძელი წამწამები თოვლით დაფარული, ეს რომ დავინახე მართლა გულიანი სიცილი ამიტყდა. ისე გვეცინებოდა ორივეს, ყველას ტაში დავიმსახურეთ.
კარგი სცენა გამოვიდა, მაგრამ ოპერატორმა მეორე დუბლი გადავიღოთო, ამაზე ეჩხუბა რეჟისორი, მაგრამ ოპერატორმა თქვა: განათება არ იყო საკმარისიო, ასე რომ გადავიღეთ მეორე სცენა და ისეთი სიცილი აღარ გამოგვივიდა.
კარგა ხანია ჯულიეტა აღარ მინახავს. ვნანობ, რომ აღარ არის.
მსგავსი სტატიები:
მოქალაქეების მიზნობრივ სოციალურ დახმარებაზე გიორგი გახარიამ ისაუბრა
2021 წლიდან უფროსი და წამყვანი სპეციალური მასწავლებლები სტატუსის შესაბამის დანამატს აიღებენ
წელს ბათუმში ნათლისღებას ზღვაში შესვლის ტრადიციული რიტუალი არ შესრულდება
გია ვოლსკი კორონავირუსის საწინააღმდეგო ვაქცინით საჯაროდ აიცრა
9 აპრილის ტრაგედიას შეწირული 21 გმირი! – დამოუკიდებლობისთვის ბრძოლის სისხლიანი დღე
“დიახ ჩვენ ვართ პირველები, არა მარტო ჩვენს სკოლაში, არამედ გურიაში…”
ვადაგასული წამლების რეალიზება – საწარმოს 99 239 ფარმაცევტული პროდუქტი ჩამოერთვა
გენდერული კვოტირების შემცირება – ქალთა მოძრაობა საგანგებო განცხადებას ავრცელებს