რუსი ჯარისკაცი – “ისეთი შეგრძნებაა, თითქოს ყველა გასანადგურებლად გავგზავნეს”

რუსი ქალის თქმით, მას დისშვილისგან აქვს ინფორმაცია დანაყოფში მიმდინარე სისტემატური გამოძალვის, ქურდობისა და ძალადობის შესახებ. თავად ჯარისკაცის განცხადებით, პოლკის სარდლობა ფიზიკური ძალადობის მუქარით მოითხოვს, რომ პირადმა შემადგენლობამ გადასცეს ფული “დანაყოფის საჭიროებებისთვის”.

თანხის შეგროვება ხდება “ნებაყოფლობით-იძულებითი” წესით, ფული ირიცხება ოფიცრების პირად ბარათებზე. დასახელებულია კონკრეტული მიმღები — ლეიტენანტი რუსლან დაუდაჯიევიჩ ო, ზედმეტსახელით “დარგინეცი”, რომლის ანგარიშზეც ჯარისკაცები რიცხავენ თანხებს, რასაც “ასეულის ფონდი” ეწოდება. მისი თქმით, არ არსებობს დადასტურება, რომ ეს ფული სამხედრო მოსამსახურეების საჭიროებებზე იხარჯება.

დულიანოვის ვიდეომიმართვის შინაარსი:

“აქ არ გვაქვს არც სასმელი და არც საჭმელი. ვაშლებს ვღეჭავთ, მანამდე ქერქს ვჭამდით. აქ არაფრის მომარაგება სათანადოდ არ ხდება. სამაგიეროდ, მეთაურობა ფულს აგროვებს. ჯგუფი, რომელშიც თავიდან ვიყავი, დაშალეს. მხოლოდ ერთი ადამიანი დარჩა ცოცხალი.”

დულიანინოვის თქმით, სამხედრო მოსამსახურეებს აიძულებენ, დატოვონ საბანკო ბარათები და PIN-კოდები შტურნზე წასვლამდე, რის შემდეგაც იპარავენ პირად ნივთებს. სარდლობა, მისი მტკიცებით, გასცემს “დაუსაბუთებელ ბრძანებებს”, გზავნის ჯარისკაცებს იერიშებზე მინიმალური საბრძოლო მასალით და საკვების გარეშე. დრონებისა და არტილერიის მხარდაჭერა არ არის უზრუნველყოფილი. დულიანინოვმა განაცხადა მძიმე დანაკარგების შესახებ, რომლებიც გამოწვეულია არაკომპეტენტური მეთაურების მიერ.

“ისეთი შეგრძნებაა, თითქოს ყველა გასანადგურებლად გაგზავნეს. ბიჭები ახალგაზრდები არიან, აქ იღუპებიან ერთმანეთის მიყოლებით,ეს კატასტროფაა.”

ჯარისკაცი ამტკიცებს, რომ პოლკში გავრცელებული პრაქტიკაა “განულება” — “არასასურველი” სამხედრო მოსამსახურეების ფიზიკური ლიკვიდაცია. მისი თქმით, ჯარისკაცების “განულების” ბრძანებას გასცემს მეთაური ზედმეტსახელით “სუმრაკი”, ხოლო ასრულებს სამხედრო მოსამსახურე ზედმეტსახელით “ზაიაცი”. თავად დულიანინოვმა უარი თქვა ასეთი ბრძანებების შესრულებაზე.

ვლადიმერი ასახელებს შემდეგ სამხედრო მოსამსახურეებს, რომლებიც მონაწილეობენ გამოძალვასა და ძალადობაში: “ვუდმენი” (ბატალიონის მეთაური), “ბორზი” (ბატალიონის მეთაურის მოადგილე, აგროვებს თანხებს), “სუმრაკი”, “დარგინეცი” (ასეულის მეთაურები, აგროვებენ ფულს), “ტერეკი”. ის აცხადებს, რომ ეს ადამიანები ქურდობენ, ახორციელებენ ზეწოლას პირად შემადგენლობაზე და მალავენ “განულებებს” ჯარისკაცების დეზერტირობაში დადანაშაულებით.

დულიანინოვის თქმით, მე-6 სატანკო პოლკის ჯარისკაცები საკუთარი ხარჯებით უზრუნველყოფენ საკუთარ თავს, ყიდულობენ ფორმასა და საკვებს. დანაყოფი მისიაზე იგზავნება წყლის, საკვებისა და მხარდაჭერის გარეშე – “ჩვენი მეთაურები ნაძირლები არიან. უბრალოდ გვგზავნიან, რომ ვიყოთ ხორცი. არავინ გვყავს, ვინც საკვებს მოგვიტანს. არაფერი მოგვეწოდება, არაფერია ორგანიზებული…

სრული ვიდეოს სანახავად იხილეთ ალფა სიხშირის ტელეგრამ არხის ბმული-