“ისრაელში შვიდდღიანი გლოვის დასრულებისა და მამაჩემის ცხედრის ისრაელში გადმოსვენებასთან დაკავშირებული მრავალი სირთულის შემდეგ, ახლა უკვე შემიძლია საკუთარი პოზიცია საჯაროდ გამოვხატო.

მამაჩემის სიკვდილი მოსალოდნელი იყო, და ამის შესახებჯერ  როგორც ისრაელის, ისე საქართველოს ხელისუფლებას, ორნახევარ წელზე მეტი ხნის განმავლობაში, უამრავჯერ,  ვაფრთხილებდი.

ვცდილობდი ამ ტრაგიკული შედეგის თავიდან აცილებას სხვადასხვა გზით, მათ შორის საქართველოს სხვადასხვა მედიასაშუალების მეშვეობით, თუმცა, როგორც ამიხსნეს, საქართველოში პრესის თავისუფლება მნიშვნელოვნად არის შეზღუდული.

მივმართე მრავალ უწყებას, რომელთაც მამაჩემის უფლებების დაცვა ევალებოდათ. პირველ რიგში — ისრაელის საკონსულოს თბილისში, ასევე ისრაელის ეროვნული უსაფრთხოების მინისტრს, იტამარ ბენ-გვირს, რომელმაც გასული წლის აგვისტოში საქართველოში ვიზიტის დროს ეს საკითხი პირადად დააყენა საქართველოს იუსტიციის მინისტრთან შეხვედრისას;

უპირველეს ყოვლისა, პასუხისმგებლობას ვაკისრებ ქუთაისის ციხის ადმინისტრაციას, პერსონალსა და „ექიმებს“, რომლებმაც, ჩემი აზრით, დაარღვიეს ექიმის ფიცი და გამოავლინეს დანაშაულებრივი გულგრილობა მამაჩემის, ამავე ციხის პატიმრის, იგორ ასკაროვის მისამართით;

ჩემს განკარგულებაშია მრავალი ჩანაწერი, რომელიც ჩემს განცხადებებს ადასტურებს. მამაჩემის თქმით, მომხდარის მიზეზი იყო სუფთა ანტისემიტიზმი, მოტივი — ქრთამი, ხოლო საშუალებები — სისტემატური ფიზიკური და ფსიქოლოგიური ძალადობა, ადამიანის მინიმალური უფლებების ჩამორთმევა და ფულის გამოძალვა.

სწორედ ამ სისტემამ გამოიწვია საბოლოოდ მამაჩემის სიკვდილი. მეორე მხრივ, არანაკლებ პასუხისმგებელია ისრაელის კონსული თბილისში, რომელმაც ყველაფერი იცოდა და არაფერი გააკეთა. მეტიც, მან დაიჯერა ციხის ექიმების მტკიცება, თითქოს „იგორი ჯანმრთელია, როგორც ხარი“, მიუხედავად იმისა, რომ იგი არასოდეს გადაუყვანიათ საავადმყოფოში სრულფასოვანი გამოკვლევისთვის და ხანგრძლივი პერიოდის განმავლობაში ექვემდებარებოდა სასტიკ მოპყრობას. როგორც არაერთხელ გავაფრთხილე როგორც მოქმედი, ისე ყოფილი კონსული, მათი უმოქმედობა მხოლოდ აძლიერებდა ანტისემიტურ დამოკიდებულებას მამაჩემის მიმართ. მე ვადანაშაულებდი წინა კონსულს ანტისემიტიზმის მხარდაჭერასა და დანაშაულებრივ გულგრილობაში, და საბოლოოდ ჩემი ეჭვები გამართლდა. ისრაელის კონსული თბილისში, თავისი ხელმძღვანელობის, მათ შორის ისრაელის საგარეო საქმეთა სამინისტროს გენერალური დირექტორის მოადგილის, ბატონი ელი იფრაჰის მითითებით, შეუერთდა მამაჩემის მიმართ განხორციელებული ძალადობის ამ ჯაჭვს, და ამისთვის პასუხისგება მოუწევთ. აუცილებელია გამოძიებამ დაადგინოს, როგორ ახერხებდნენ ყოველ ჯერზე კონსულის შეცდომაში შეყვანას ციხეში მისი ვიზიტების დროს, როგორ აიძულებდნენ დაეჯერებინა, რომ იგორი იტყუებოდა და არანაირი ჯანმრთელობის პრობლემა არ ჰქონდა, მიუხედავად ათეულობით შეტყობინებისა და გაფრთხილებისა, რომლებიც მე კონსულს გავუგზავნე. ასევე უნდა გამოიძიონ თავად კონსულის ქმედებები: რატომ თანამშრომლობდა იგი ანტისემიტურად განწყობილ ციხის ექიმებთან და რატომ, ჩემი მრავალრიცხოვანი გაფრთხილებების მიუხედავად, უარს ამბობდა ჩემთვის დაეჯერებინა და მამაჩემის ინტერესების დასაცავად ემოქმედა.

მიუხედავად იმისა, არაერთხელ აღვნიშნე, რომ მიზეზი ანტისემიტიზმი იყო, ხოლო მოტივი — ანგარება და ქრთამი, მათ გაურკვეველი მიზეზებით უგულებელყვეს ეს გაფრთხილებები და არანაირი ნაბიჯი არ გადაუდგამთ. როგორც ბოლო სამი წლის განმავლობაში არაერთხელ შევატყობინე კონსულებს, მამაჩემის ადვოკატმა, ქალბატონმა ნათია კორკოტაძემ, რომელიც გაურკვეველ ვითარებაში აღმოჩნდა საელჩოს ვებგვერდზე გამოქვეყნებულ ადვოკატთა სიაში, მნიშვნელოვანი როლი ითამაშა ამ კორუფციულ სისტემაში. მისი კავშირები საელჩოსა და ციხის ხელმძღვანელობასთან ჯერ კიდევ საფუძვლიან გამოძიებას საჭიროებს. მას შემდეგაც კი, რაც საელჩოს მისი კორუმპირებულობის შესახებ შევატყობინე, არანაირი რეაგირება არ ყოფილა. ამავდროულად, იგი კვლავ იღებს ფოტოებს პოლიტიკოსებთან და სასამართლო სისტემის მაღალჩინოსნებთან. ამ ეტაპზე არ მსურს გამოძიების ხელის შეშლა, ამიტომ ყველა მტკიცებულებას ვინახავ. ჩემს ხელთ არის ათეულობით აუდიოჩანაწერი მამაჩემთან ციხიდან განხორციელებული საუბრებისა, სადაც იგი დეტალურად აღწერს მის მიმართ ჩადენილ ძალადობას, მიმოწერა და საუბრები სამ ყოფილ და მოქმედ კონსულთან, ასევე საგარეო საქმეთა სამინისტროს მაღალჩინოსნებთან, რომლებმაც მამაჩემის დახმარების ნაცვლად მუქარები აირჩიეს. საქართველოში ყოფნისას მე შევიტანე საჩივარი პროკურატურაში და ამ საქმეში მოწმე ვარ, მზად ვარ წარმოვადგინო ყველა მტკიცებულება, რომელიც ჩემს განკარგულებაშია. საქართველოდან გამგზავრებამდე შევხვდი მოქმედ კონსულს და ვთხოვე, რომ სრული სიმართლე ეთქვა, თუნდაც ეს მისი ხელმძღვანელობის პასუხისმგებლობას გულისხმობდეს. იმავე მოწოდებით მივმართავ ციხის თანამშრომლებსაც, რომელთაც ჯერ კიდევ შერჩათ სინდისისა და ადამიანურობის ნატამალი (და ასეთები არსებობენ): უთხარით გამომძიებლებს მთელი სიმართლე. როგორც ისრაელის კონსულს ვუთხარი: „გემი იძირება და თქვენთვის უკეთესი იქნება, თუ მასზე არ დარჩებით.“ თქვით მთელი სიმართლე და მხოლოდ სიმართლე. ამ წერილის მიზანია უზრუნველყოს ყოვლისმომცველი და საფუძვლიანი გამოძიება და ის, რომ დამნაშავეებმა დაიმსახურონ სათანადო სასჯელი. საქართველოს ხელისუფლებასთან ურთიერთობის ჩემი მწარე გამოცდილებიდან გამომდინარე, მიუხედავად იმისა, რომ საკითხი უმაღლეს დონეზე დავაყენე, მათ შორის იუსტიციის მინისტრ პაატა სალიასთან ისრაელის ეროვნული უსაფრთხოების მინისტრ იტამარ ბენ-გვირის მეშვეობით, რეალური ქმედება არ განხორციელებულა.

თუ გამოძიება პროფესიონალურად და ობიექტურად არ წარიმართება, საზოგადოებას ყველა მტკიცებულებას გავუსაჯაროებ. როგორც წარსულშიც ვაფრთხილებდი: დღეს ეს ჩემი მამაა, ხვალ კი შეიძლება თქვენი მამა იყოს. მე უკვე აღარავინ დამრჩა გადასარჩენი. თქვენ კი ჯერ კიდევ შეგიძლიათ გადაარჩინოთ თქვენი ღირსება და მომავალი იმით, რომ უზრუნველყოთ პასუხისმგებელ პირთა დასჯა. ანტისემიტებმა, რომლებიც ამ წერილს კითხულობენ, ერთი მარტივი რამ უნდა გაიგონ: ებრაული სისხლი ძვირად ფასობს. ყველა, ვინც ებრაელს ზიანს მიაყენებს, სრულად უნდა აგოს პასუხი თავისი ქმედებებისთვის კანონის მთელი სიმკაცრით. მამაჩემი ამის მაგალითი იქნება. ჩვენ არ გვავიწყდება და არ ვპატიობთ”.